G7 давлатлари Россия активларини тўлиқ мусодара қилишни ортиқ муҳокама қилмайди — ОАВ

G7 вакиллари Россия активларини тўлиқ мусодара қилиш масаласини энди муҳокама қилмайди. Бу ҳақда Financial Times хабар берди.

Украина Россия активларини тўлиқ мусодара қилишга интилишда давом этар экан, G7 расмийлари бу мавзу энди муҳокама қилинмаётганини таъкидлади. Бунинг ўрнига улар музлатилган активлардан молиялаштиришнинг муқобил йўлларини ўрганмоқда, — деб ёзади нашр.

Financial Times’га кўра, Европа давлатлари Россиянинг “қасос олишидан хавотирланиб”, активларнинг ўзига таъсир қилиши мумкин бўлган ҳар қандай нарсадан узоқ туришни истайди.

Россия-Украина уруши бошланганидан кейин G7 ва Европа Иттифоқи давлатлари Россиянинг қарийб 300 миллиард евролик валюта захираларини музлатиб қўйган. Ғарб давлатлари бу активларни тортиб олиш ва Киевга бериш йўлини фаол изламоқда.

Кремль бундай қарорларни қабул қилиш халқаро ҳуқуқнинг барча қоидалари ва нормаларини бузиш эканини айтган. Россия ТИВ активларни музлатишни ўғирлик деб атаб, бу қадамлар нафақат жисмоний шахслар маблағларига, балки давлат активларига ҳам қаратилганини таъкидлаган.

Россия ТИВ раҳбари Сергей Лавровнинг аниқлик киритишича, Россиянинг Ғарбдаги музлатилган активлари мусодара қилинган тақдирда, Россия жавоб қайтаради.

Москвада Ғарб давлатларининг Россиядаги мавжуд маблағларни қайтармаслик имконияти ҳам бор, — дея қўшимча қилган Лавров.