Rossiya harbiylari AQSH harbiylari mavjud bo‘lgan Nigerdagi Amerika havo bazasida o‘z joylarini egalladi. Bu haqda Reuters xabar berdi.
Unga ko‘ra, Rossiyalik askarlar bazada alohida binoga joylashgan va Amerika harbiylari bu bazadan endi foydalana olmasliklarini aytgan. Pentagon Rossiya harbiy kuchlarining AQSH askarlari bilan bitta bazada joylashganligini tasdiqlagan.
Bu voqea Niger hukumatining Amerika armiyasini mamlakatdan olib chiqish bo‘yicha talablari ortidan yuz bergan. Mart oyida AQSH Niger hukumatini Eronga uran konlariga kirish imkoniyatini berishga aloqador kelishuv tayyorlaganlikda ayblagandi.
Rossiyalik mutaxassislar Niger armiyasini tayyorgarlikdan o‘tkazish ishlarini boshlagan. Niger davlat televideniyesi esa Rossiyaning Il-76 samolyotining kelishini namoyish qilgan, bu Rossiya va Niger yetakchilari o‘rtasida mart oyida bo‘lgan uchrashuvdan keyingi hodisa hisoblanadi.
The Hill nashri Amerika askarlarining Nigerdan olib chiqilishi mintaqadagi AQSHning rolini zaiflashtirishi va Rossiya, Eron hamda Xitoy kabi davlatlarning Afrikadagi ta’sirini kuchaytirishi mumkinligini qayd etgan. Rossiya Mali, Burkina-Faso, Liviya va Markaziy Afrika Respublikasi bilan yaqin aloqa va xavfsizlik kelishuvlariga ega ekanligi ham tilga olingan.
Nigerda joylashgan mingdan ortiq amerikalik askarlar terrorizmga qarshi operatsiyalarda qatnashgan va mahalliy kuchlar bilan hamkorlikda mamlakatda xavfsizlikni ta’minlash ishlarini olib borgan. O‘tgan yili Nigerda ro‘y bergan harbiy to‘ntarishdan keyin Niger hukumati Amerika askarlarini olib chiqib ketishni talab qilgan va Amerika hukumati bu talabni bajarishga rozi bo‘lgan edi.
Izoh (0)