Rossiya qo‘shinlari Donetsk viloyatidagi muhim platsdarmlardan bir Pokrovsk shahrini qurshab olish bo‘yicha harakatlarini kuchaytirmoqda. Bu haqda Buyuk Britaniya Mudofaa vazirligi ma’lum qildi.
Hisobotda aytilishicha, so‘nggi bir hafta ichida rossiyaliklar Pokrovskning shimoli-sharqi bo‘ylab biroz ildamlashga muvaffaq bo‘lgan. Bu esa shaharni mudofaa qilayotgan Ukraina garnizonining ta’minot yo‘llariga xavf tug‘dirgan. Rossiya kuchlari H-32 avtomagistrali bo‘ylab Rodinsk shaharchasi tomon siljib, shuningdek, Mirolyubivka hududida ham pozitsiyalarni egallagan.
Iyul oyida Rossiya sabotaj guruhlari Pokrovsk janubiga kirishga urinib ko‘rgan, ammo bu urinish Ukraina mudofaachilari tomonidan bartaraf etilgan edi. 2024-yil fevral oyida Avdiyivka bosib olinganidan buyon Rossiya uchun asosiy hujum yo‘nalishi Pokrovsk bo‘lib qoldi. Ukraina rasmiylarining ma’lum qilishicha, so‘nggi 24 soat ichida Pokrovsk yo‘nalishi bo’ylab 66 ta hujum qaytarilgan.
Rossiya va Ukraina harbiy harakatlarni davom ettirar ekan, urushni diplomatik yo‘l bilan yakunlash haqidagi bayonotlar va reallik o‘rtasidagi masofa tobora uzoqlashmoqda. Istanbul shahrida boshlangan muzokaralar, asirlar va jasadlar amlashinuvi kabi kichik kelishuvlarni hisobga olmasa, aytarlik natija olib kelmadi.
Rossiya sobiq prezidenti va hozirda RF Xavfsizlik kengashi raisi o‘rinbosari hisoblangan Dmitriy Medvedovning yadroviy qurol haqidagi bayonotlari ortidan Tramp Qo‘shma Shtatlarning ikkita yadroviy suvosti kemasi noma’lum hududga joylashtirilishini aytdi. Oq uy rahbari, shuningdek, uning mamlakati Rossiya bilan “yadroviy urushga tayyorligi”ni ta’kidladi.
Izoh (0)