Буюк Британия ташқи ишлар вазири Дэвид Кэмерон 24 апрель куни қозоғистонлик ҳамкасби Мурат Нуртлеу билан учрашди. У суҳбат давомида Марказий Осиёга ташрифига тўхталиб, Қозоғистон ёки бошқа давлатга танлов қилиши кераклиги сўралмаётганини таъкидлади. Бу ҳақда Tengrinews хабар берди.
“Қозоғистонга ёки бошқа бир давлатга танлов қилиш кераклигини ёки Россия, Хитой фойдасига ҳамкорлик ҳамда савдо қилмасликни сўрамаяпмиз. Бу ердалигимиз сабаби сиз умумий хавфсизлигимиз ва фаровонлигимиз учун ижобий бўлган тарзда биз билан ҳамкорлик қилишни танлаш имкониятига эга бўлишингиз керак деб ҳисоблаймиз. Таъкидлаганимиздек, сиз Россия, Хитой, Эрон ва Афғонистон билан қўшни бўлиб, ҳаётий муҳим минтақада жойлашгансиз. Бу ерда кўплаб глобал чақириқлар мавжуд.
Буюк Британия шу ерда бўлиши ва таълимни, бизнесни ривожлантириш, иқлим ўзгаришига қарши курашиш, ёшларга янги имкониятлар яратишда ҳамкор бўлишимизни айтиш биз учун муҳим. Сиздан биз ёки бошқа держава ўртасида танлов қилишингизни сўрамаяпмиз”, — деди Кэмерон.
Кэмероннинг Тошкентга ташрифи
23 апрель куни Британия ташқи ишлар вазири ўзбекистонлик ҳамкасби Бахтиёр Саидов билан учрашди. Учрашувда барча соҳалар бўйича икки томонлама алоқаларни мустаҳкамлашга қаратилган асосий вазифалар белгилаб олинди.
Шунингдек, таълим соҳасидаги ҳамкорликни ривожлантиришга ўзаро тайёрлик қайд этилди. Музокаралар якунида Кенг қамровли шерикчилик тўғрисидаги декларация, Минтақавий ва халқаро боғлиқлик ҳамда инфратузилма соҳаларидаги ҳамкорлик тўғрисидаги англашув меморандуми имзоланди.
Шу куни Кэмерон Олий Мажлис Сенати раиси Танзила Норбоева билан ҳам учрашув ўтказди. Суҳбат давомида яшил иқтисодиётни ривожлантириш соҳасида қўшма лойиҳаларни йўлга қўйиш, иқлим ўзгариши оқибатларига қарши курашда ўзаро ҳамкорликни кучайтириш муҳимлиги айтилди.
Дэвид Кэмерон Ўзбекистонда инсон ҳуқуқларини таъминлаш, хусусан, муносиб меҳнат тамойилларини жорий этиш, гендер тенгликка эришиш, оилавий зўравонликка қарши курашиш борасида ижобий ишлар амалга оширилаётганини алоҳида қайд этди.
Изоҳ (0)