BMT Bolalar jamg‘armasi (UNICEF) G‘azoda ocharchilik xavfi keskin ortib borayotganini va har uchinchi inson bir necha kunlab ovqatsiz qolayotganini ma’lum qildi. Tashkilotning ta’kidlashicha, ocharchilik sabab halok bo‘lganlar soni 162 nafarga yetgan, shundan 92 nafari bolalardir.
UNICEF rahbari o‘rinbosari Ted Chayban Isroil, G‘azo va G‘arbiy Sohilda bo‘lib qaytgach, vaziyat achinarli darajaga yetganini tasdiqladi.
“Bugun tanlov nuqtasidamiz. Qabul qilinadigan qarorlar o‘n minglab bolalarning yashashi yoki o‘lishini belgilab beradi”, degan u.
Shanba kuni 17 yoshli g‘azolik O‘tef Abu Xoter ochlikdan halok bo‘ldi. Shifokorlarning aytishicha, Isroilning anklavga hujumlaridan avval sog‘lom bo‘lgan yigit so‘nggi haftalarda oziq-ovqat tanqisligi sabab jon bergan.
Umuman olganda, 2023-yilning 7-oktyabr sanasidan beri Isroil hujumlari natijasida 60 mingdan ortiq falastinlik halok bo‘lgan, ulardan 18 ming nafari bolalardir. Ammo bu hammasi emas. Ko‘plab qurbonlar vayronalar ostida qolib ketgani bois bedarak yo‘qolganlarning aniq soni haqida ma’lumot yo‘q.
Yahudiy davlati joriy yilning mart oyidan boshlab Isroilga gumanitar yuklar kirishini to‘xtatib qo‘ydi. Natijada anklav bo‘ylab qisqa vaqt ichida ocharchilik avj oldi. Isroil may oyi oxiriga kelib cheklovlarni biroz yumshatdi. AQSH ko‘magi bilan tashkil etilgan GHF (Gaza Humanitarian Foundation) tashkiloti UNRWA vakolatlarini o‘z qo‘liga oldi.
Biroq GHF tarqatish punktlariga kelgan tinch aholi o‘qqa tutilgan holatlar sabab tashkilotga nisbatan tanqidlar keskin urchidi. BMT ma’lumotiga ko‘ra, oziq-ovqat olish uchun kelgan 1 300 dan ortiq falastinlik o‘ldirilgan. G‘azoda qolgan faollar va jurnalistlar ularga Isroil askarlari bilan bir qatorda, AQSH yollagan xususiy harbiy kompaniya xodimlari ham o‘t ochganini ma’lum qilgan.
Xalqaro bosim ortidan AQSH prezidenti Donald Trampning maxsus vakili Stiv Uitkoff va Qo‘shma Shtatlarning Isroildagi elchisi Mayk Xakabi GHF tarqatish punktida bo‘lib, vaziyatni ko‘zdan kechirdi. HAMAS esa ularning tashrifini jamoatchilik fikrini chalg‘itish uchun uyushtirilgan spektakl deb atadi.
GHF punktlari bilan bir qatorda, anklavga G‘arb va arab davlatlari tomonidan havo orqali gumanitar yuklar tashlash ham boshlandi. Ammo xalqaro insonparvarlik tashkilotlari bu yetarli emasligini bildirgan.
“Har bir yo‘l, har bir darvoza ochilishi lozim, havodan tashlanayotgan yordam quruqlik orqali kelayotgan yuk mashinalari o‘rnini qoplay olmaydi. Bolalarga kerak bo‘lgani – barqaror o‘t ochishni to‘xtatish va siyosiy yechimdir”, degan UNICEF rasmiysi Chayban.
Isroil bosh vaziri Binyamin Netanyaxu va sobiq mudofaa vaziri Goav Gallantga qarshi Xalqaro jinoiy sud hisbga olish orderini bergan. Ular “insoniyatga qarshi jinoyat” bo‘yicha mahkamaga tortilgan.
Izoh (0)