Rossiya va Ukraina urushda ko‘chirilgan bolalar masalasida ilk bor yuzma-yuz muzokaralar o‘tkazdi. Bu haqda Rossiya prezidenti huzuridagi bolalar huquqlari bo‘yicha vakil Mariya Lvova-Belovaga tayanib, Euronews xabar berdi.
Uchrashuv Qatar vositachiligida Dohada bo‘lib o‘tdi. Vakilning so‘zlariga ko‘ra, tomonlar 29 nafar bola Rossiyadan Ukrainaga, 19 nafari esa Rossiyaga qaytarilishiga kelishib olgan. Ombudsman ro‘yxatlar allaqachon qayd etilganini qo‘shimcha qilgan.
Kiyevning ta’kidlashicha, Rossiya—Ukraina urushi boshlanganidan beri Ukrainadan 19 mingdan ortiq bola olib ketilgan. Lvova-Belova bu ma’lumotni soxta deb atagan.
O‘tgan yilning mart oyida Xalqaro jinoiy sud Lvova-Belovani hamda Rossiya prezidenti Vladimir Putinni ukrainalik bolalarni noqonuniy deportatsiya qilishda ayblab, hibsga olishga order bergan edi.
Ukrainalik deportatsiya qilingan bolalardan biri Rostislav. U Xerson yaqinida o‘g‘irlab ketilgan. Bola harbiy tayyorgarlikdan o‘tayotgan joydan qochishga muvaffaq bo‘lgan.
U yer qo‘rqinchli edi. Men u yerdan qochmoqchi edim, ammo oqibatlari dahshatli bo‘lishini bilardim, — deya eslaydi Rostislav.
Hozirgacha men va hamkasblarim ochiq manbalar va boshqa vositalar yordamida 60 ta shunday joylarni topishga muvaffaq bo‘ldik. Ular nafaqat Ukraina bilan chegarada, balki Rossiyaning uzoq sharqiy qismida ham joylashgan, — ta’kidlagan harbiy jinoyatlarga ixtisoslashgan ukrainalik tergovchi Vladislav Gavrilov.
Izoh (0)