Rossiya prezidenti Vladimir Putin imzolagan yangi qonunga ko‘ra, endilikda politsiya fuqarolarning bank hisoblarini sud qarorisiz 10 kungacha muzlatib qo‘yish imkoniga ega bo‘ladi.
Yangi tartibga binoan, Ichki ishlar vazirligi tergovchilari fuqaroning muayyan jinoyatga aloqadorligidan shubhalansa, uning bank hisoblarini muzlatib qo‘yishi mumkin. Bu uchun prokuror va tergov organi rahbarining roziligi talab etiladi xolos. Shundan so‘ng rasmiylar sudga rasmiy arizani 10 kun ichida yuborishi talab etiladi.
Avvallari bunday mexanizm faqat mol-mulk musodara qilinadigan ishlar bo‘yicha qo‘llanilgan edi. Endi esa politsiya aktivlarni “shubhaga asoslanib oldindan bloklashi” mumkin bo‘ladi.
Shuningdek, yangi qonun bilan banklar huquqni muhofaza qiluvchi organlarning fuqaro bank hisobi va pul o‘tkazmalari haqida so‘rovlariga uch kun ichida javob berishi kerak bo‘ladi. Agar so‘rov elektron shaklda yuborilsa, muddat 24 soatgacha qisqaradi.
Rasmiylar bu o‘zgarishlardan maqsad kiberjinoyatlar va moliyaviy firibgarlik holatlariga qarshi kurash ekanini ta’kidlamoqda. Biroq huquqshunoslar qonunning aniq mezonlari yo‘qligini va u suiste’mol holatlariga yo‘l ochishi mumkinligini bildirishgan.
Advokat Yuliy Tayning aytishicha, qonunda qaysi jinoyatlar uchun bank hisoblari muzlatilishi aniq ko‘rsatilmagan. Shu bilan birga, muzlatiladigan summa zarar miqdoriga mos bo‘lishi kerakligi ham belgilab qo‘yilmagan.
Yana bir mutaxassis Ruslan Zafesov huquqni muhofaza qilish organlariga berilgan yangi vakolatlar ortidan mulkni asossiz musodara qilish xavfi kuchayishini ta’kidlagan. Boshqa tanqidchilar esa ushbu qonun siyosiy muxoliflar, jurnalistlar va faollarni bosim ostiga olish uchun ham ishlatilishi mumkinligidan xavotirda.
Izoh (0)