O‘zbekistonda 2024-yilga kelib gaz va neft qazib olish, benzin ishlab chiqarish keskin qisqardi. Bu haqda Statistika agentligi hisobotida ma’lum qilindi.
Qayd etilishicha, 2024-yilning mart oyi davomida gaz qazib olish 2023-yildagi ko‘rsatkichdan ham qisqargan. Bu oyda 3,9 milliard kubdan kamroq gaz qazib olinib, 2019-yildagi holat bilan solishtirilganda 1,4 milliard kub kam gaz qazilgan.
Mazkur holatga e’tibor qaratgan iqtisodchi bloger Otabek Bakirov “Bu savolga javob olish uchun so‘roqqa tutilishi lozim bo‘lganlar hech bo‘lmasa shu murakkab evrilish kunlarida yuz ko‘rsatishi, xatolarini tan olishlari, mard bo‘lib mas’uliyatni bo‘yniga olishlari kerak edi. Lekin ular hozir juda muhim bo‘lgan vazifa — xalq va biznes bilan kommunikatsiyani yo‘lga qo‘yish o‘rniga orqavarotda berkinib, sohani shimoldagi og‘alari foydasiga zimdan cho‘ktirishda va o‘zlashtirishga asoslangan samarasiz boshqaruv bilan iqtisodiy degradatsiyani tezlashtirishni ma’qul ko‘rishmoqda”, deb yozmoqda.
Statistika agentligining neft qazib olish borasidagi ma’lumotlariga ko‘ra, joriy yilning mart oyida neft qazib olish 60,6 ming tonnagacha qisqargan. O‘tgan yilning martiga nisbatan cho‘kish 7,6 ming tonnani tashkil etgan.
Neft qazib olish bilan sinxron qulayotgan benzin ishlab chiqarish hajmi 119,5 ming tonnani tashkil etgan. Bu o‘tgan yilning tegishli davri bilan solishtirganda 1,9 ming tonna kam, — deydi bloger.
Qo‘shimcha qilinishicha, mamlakatda sanoat mahsulotlari orasida sement ishlab chiqarish 216,4 ming tonnaga kamayib, 905,5 ming tonnagacha qisqargani ma’lum bo‘ldi.
Izoh (0)