Ўзбекистонда 2024 йилга келиб газ ва нефть қазиб олиш, бензин ишлаб чиқариш кескин қисқарди. Бу ҳақда Статистика агентлиги ҳисоботида маълум қилинди.
Қайд этилишича, 2024 йилнинг март ойи давомида газ қазиб олиш 2023 йилдаги кўрсаткичдан ҳам қисқарган. Бу ойда 3,9 миллиард кубдан камроқ газ қазиб олиниб, 2019 йилдаги ҳолат билан солиштирилганда 1,4 миллиард куб кам газ қазилган.
Мазкур ҳолатга эътибор қаратган иқтисодчи блогер Отабек Бакиров “Бу саволга жавоб олиш учун сўроққа тутилиши лозим бўлганлар ҳеч бўлмаса шу мураккаб эврилиш кунларида юз кўрсатиши, хатоларини тан олишлари, мард бўлиб масъулиятни бўйнига олишлари керак эди. Лекин улар ҳозир жуда муҳим бўлган вазифа — халқ ва бизнес билан коммуникацияни йўлга қўйиш ўрнига орқаваротда беркиниб, соҳани шимолдаги оғалари фойдасига зимдан чўктиришда ва ўзлаштиришга асосланган самарасиз бошқарув билан иқтисодий деградацияни тезлаштиришни маъқул кўришмоқда”, деб ёзмоқда.
Статистика агентлигининг нефть қазиб олиш борасидаги маълумотларига кўра, жорий йилнинг март ойида нефть қазиб олиш 60,6 минг тоннагача қисқарган. Ўтган йилнинг мартига нисбатан чўкиш 7,6 минг тоннани ташкил этган.
Нефть қазиб олиш билан синхрон қулаётган бензин ишлаб чиқариш ҳажми 119,5 минг тоннани ташкил этган. Бу ўтган йилнинг тегишли даври билан солиштирганда 1,9 минг тонна кам, — дейди блогер.
Қўшимча қилинишича, мамлакатда саноат маҳсулотлари орасида цемент ишлаб чиқариш 216,4 минг тоннага камайиб, 905,5 минг тоннагача қисқаргани маълум бўлди.
Изоҳ (0)