O‘zbekistonning eksport hajmi uch oydan qariyb 6,4 milliard dollarga yetdi. Bu haqda Statistika agentligi xabar berdi.
Qayd etilishicha, 2024-yilning yanvar—mart oylarida erishilgan ko‘rsatkichlar o‘tgan yilning mos davri bilan solishtirilganda 10 foizga ko‘p.
Shuningdek, uch oy davomida mamlakatning tashqi savdo aylanmasi 15,8 milliard dollarga yetgan. Tashqi savdo aylanmasi hajmi 2023-yilning mos davri bilan solishtirilganda 927,9 million dollarga yoki 6,2 foizga oshgan.
Toshkent shahri O‘zbekistonning tashqi savdo aylanmasi tarkibida eng yuqori 38,5 foiz ulushni egallagan — uch oyda qariyb 6,1 milliard dollarga yetgan.
Yanvar—mart oylarida O‘zbekiston jahonning 184 ta mamlakati bilan savdo aloqalarini amalga oshirgan. Tashqi savdo aloqasining nisbatan salmoqli hissasi Xitoy (19 foiz), Rossiya (17,7 foiz), Qozog‘iston (5,9 foiz), Turkiya (4,1 foiz) va Janubiy Koreyada (3,4 foiz) qayd etilgan.
- eksport – 6,4 milliard dollar;
- import – 9,4 milliard dollar.
tashqi savdo aylanmasida yuqori ulushga ega bo‘lgan hamkor davlatlar (AQSH dollarida):
- Xitoy – 3 milliard dollar;
- Rossiya – 2,8 milliard dollar;
- Qozog‘iston – 937,7 million dollar;
- Turkiya – 656,3 million dollar;
- Janubiy Koreya – 544,1 million dollar;
- Fransiya – 337,1 million dollar;
- Germaniya – 268,1 million dollar;
- Turkmaniston – 235,2 million dollar;
- Afg‘oniston – 224,8 million dollar;
- Hindiston – 213 million dollar.
Shavkat Mirziyoyev raisligida yanvar o‘rtalarida eksport, investitsiya va mahalliy sanoatda 2024-yilda turgan vazifalar bo‘yicha yig‘ilish o‘tkazilgandi. O‘shanda prezident bevosita investitsiya, sanoat va eksportga masʼul 11 ta vazirlik va idora, 10 ta uyushma, xorijdagi diplomatik vakolatxonalar, bundan tashqari, barcha vazirlik, tarmoq va hududlarda eksport va investitsiyaga masʼul rahbar o‘rinbosari faoliyat yuritayotgan investitsiyalar va tashqi savdo tizimining faoliyati juda sustligini ko‘rsatib o‘tgan edi.
Izoh (0)