O‘zbekiston hududining katta qismida bugun, 22-aprel yog‘ingarchiliksiz ob-havo bo‘lishi kutilmoqda. Faqat Toshkent, Samarqand, Jizzax viloyatlari hamda Farg‘ona vodiysining ba’zi joylarda qisqa muddatli yomg‘ir yog‘adi, momaqaldiroq bo‘lishi mumkin. Bu haqda “O‘zgidromet” haftalik prognozida ma’lum qildi.
Qayd etilishicha, 23-aprelda kunning ikkinchi yarmida faqat Toshkent viloyatida va Farg‘ona vodiysi viloyatlarida momaqaldiroq bilan qisqa muddatli yomg‘ir yog‘ishi mumkin. 24-aprelda esa O‘zbekiston hududining katta qismida yog‘ingarchilik kutilmaydi.
Shuningdek, 25—26-aprel kunlari respublikaning markaziy va sharqiy hududlarida qisqa muddatli yomg‘ir yog‘adi, momaqaldiroq bo‘ladi. Ushbu kunlarda harorat foni deyarli o‘zgarmaydi. Harorat asosan kechalari 13-18 daraja, kunduz kunlari 24-29 daraja bo‘ladi.
22—26-aprelda tog‘oldi va tog‘li hududlarda vaqti-vaqti bilan qisqa muddatli yomg‘ir yog‘adi, momaqaldiroq bo‘ladi. 24—25-aprelda shimolda va cho‘l hududlarning baʼzi joylarida shamol tezligi 15-20 metr/sekundgacha kuchayadi, ayrim joylarda chang-to‘zon bilan kuzatiladi.
22-aprelda harorat ko‘tarilishi hisobiga baland tog‘larda qor ko‘chish xavfi saqlanib turadi. 22—23-aprelda tog‘oldi va tog‘li hududlarda sel-suv toshqin hodisalari yuzaga kelishi mumkin.
Toshkent shahrida havo o‘zgarib turadi, 22—23-aprel va 25-aprelda vaqti-vaqti bilan qisqa muddatli yomg‘ir yog‘adi, momaqaldiroq bo‘lishi mumkin. 24-aprelda yog‘ingarchilik kutilmaydi. Shamol sharqdan 5-10 metr/sekund tezlikda esadi. Harorat asosan kechalari 14-17 daraja, kunduz kunlari 23-28 daraja bo‘ladi.
Izoh (0)