Davlat xavfsizlik xizmati xodimlari tomonidan Qirg‘iziston va Tojikistondan olib kelingan jami 11,2 kilogramm giyohvandlik vositasi musodara qilindi.
Qayd etilishicha, DXXning Namangan viloyati bo‘yicha boshqarmasi xodimlari tomonidan o‘tkazilgan tezkor tadbirda Chortoq—Namangan yo‘nalishida harakatlanayotgan Nexia rusumli transport vositasi to‘xtatilib, ko‘zdan kechirilgan.
Avtomashinada yo‘lovchi sifatida ketayotgan Chortoq tumanida yashovchi, muqaddam sudlangan 38 yoshli shaxsning yonida 2 kilogramm 47 gramm gashish moddasi borligi aniqlanib, protsessual tartibda rasmiylashtirib olingan. Shuningdek, uning yashash xonadonidan ham kelgusida sotish maqsadida saqlanayotgan 4 kilogramm 942 gramm gashish moddasi topilgan.
Tergovga qadar tekshiruv davomida, ushbu narkotik moddalar muqaddam qirg‘izistonlik narkokuryerlar tomonidan Chortoq tumaniga olib kelinib, xufiya joyga qoldirib ketilganligi maʼlum bo‘lgan.
Davlatobod tumanida o‘tkazilgan tezkor tadbirda, Yangiqo‘rg‘on tumanida yashovchi, muqaddam sudlangan 28 yoshli shaxs o‘zining boshqaruvida bo‘lgan Lacetti rusumli avtomashinada 1 kilogramm 842 gramm gashish moddasini Namangan shahrida istiqomat qiluvchi, 40 yoshli fuqaroga 14 ming dollarga sotishga kelishib, kelishilgan puldan 10 ming dollarni olgan vaqtida ushlangan.
Tergovga qadar tekshiruv davomida, ushbu giyohvandlik vositasini qirg‘izistonlik narkokuryer muqaddam Yangiqo‘rg‘on tumanidagi xufiya joyga qoldirib ketgani maʼlum bo‘lgan.
Samarqand viloyatining Urgut tumanida yashovchi, 1988, 1995, 1998-yillarda tug‘ilgan uch nafar fuqaro Tojikistondan olib kelingan 936 gramm opiy moddasini xaridorga berib, undan kelishilgan pul mablag‘ini olgan vaqtida Davlat xavfsizlik xizmati va ichki ishlar organlari xodimlari tomonidan ushlangan.
Shuningdek, tezkor tadbir davom ettirilib, ularning jinoiy sherigi bo‘lgan – 32 yoshli urgutlik shaxs ham qo‘lga olingan.
Bundan tashqari, Davlat xavfsizlik xizmatining Farg‘ona viloyati bo‘yicha boshqarmasi xodimlari tomonidan o‘tkazilgan tezkor tadbirda Quvasoy shahrida yashovchi 38 yoshli shaxs muqaddam tojikistonlik jinoiy sherigi tomonidan Quvasoy shahridagi xufiya joyga qoldirib ketilgan 950 gramm gashish moddasini olib, uni 37 yoshli hamshahariga pulini keyinchalik berish sharti bilan 6 ming dollarga sotgan vaqtida ushlangan.
Tergovga qadar tekshiruv davomida, ushbu narkotik savdosiga Quvasoy shahrida yashovchi 22 yoshli fuqaro ham aloqador ekanligi aniqlanib, u ham qo‘lga olingan.
Boshqa holatda esa Qo‘qon shahrida yashovchi 61 yoshli fuqaro Tojikistondan olib kelingan 492 gramm gashish moddasini 75 million so‘mga sotgan vaqtida ashyoviy dalillar bilan ushlangan.
Hozirda mazkur shaxslarning barchasiga nisbatan jinoyat ishlari qo‘zg‘atilib, qamoq ehtiyot chorasi qo‘llanilgan.
Izoh (0)