Eron havo hujumidan mudofaa tizimi Isfahon osmonida bir nechta dronlarni urib tushirdi. Bu haqda Eron ommaviy axborot vositalari xabar berdi.
Ma’lum qilinishicha, aviatexnikalar Isroil tomonidan uchirilgan. Eron hududiga hujum sodir etilgani haqida hozircha rasmiy xabarlar yo‘q. Dastlab Amerikaning ABC News telekanali Isroil Eronga raketa hujumi uyushtirgani haqida xabar bergan. OAV ma’lumotlariga ko‘ra, portlashlar Isfahon aeroporti hududida sodir bo‘lgan va u yerda Eron havo kuchlarining 8-havo mudofaa tizimlari faollashgan.
Isfahonda uchta portlash ovozi eshitilgan, ehtimol, kichik dronlarning paydo bo‘lishi sababli havo hujumidan mudofaa tizimi ishlagan.
Ta’kidlanishicha, shahardagi yadro inshootlari butunlay xavfsiz holatda. IRNA davlat agentligi havo hujumidan mudofaa tizimi Eronning boshqa viloyatlarida ham hujumni qaytarganini yozmoqda. Xususan, portlash ovozi Tabriz g‘arbida va Vodi-i Rahmat hududida eshitilgan. Mamlakat rasmiylari Tehron, Isfahon va Sheroz ustidan parvozlarni bekor qilgan.
Bloomberg amerikalik rasmiylarga tayanib, Isroil 18-aprel kuni AQSHni yaqin 24-48 soat ichida Eronga javob zarbasi berishidan ogohlantirganini yozmoqda. Hozirda Isroilda ham havo hujumidan mudofaa tizimi ishga tushgan.
Eron va Isroil o‘rtasidagi keskinlik
Isroil 1-aprel kuni Damashqdagi Eron konsulligiga aviazarbasi berdi. Diplomatik kvartalga uyushtirgan hujum oqibatida eronlik generallar Muhammad Rizo Zohidiy va Muhammad Hodi hoja Rahimiy, shuningdek, Islom inqilobi qo‘riqchilari korpusining besh nafar zobiti halok bo‘ldi.
Isroil hujumini O‘zbekiston tashqi ishlar vazirligi ham qoraladi. Eron konsulligiga uyushtirilgan hujumga javoban 14-aprelga o‘tar kechasi Isroil hududiga 300 dan ortiq dron, qanotli va ballistik va raketalar uchirdi. Isroil armiyasi ularning 99 foizi urib tushirilgani, bunga 3,5 million dollar sarflanganini da’vo qildi.
Erondan uchirilgan dron va raketalarni urib tushirishga AQSH ham yordam berdi. Hujumdan keyin Jo Bayden Isroil bosh vaziri Binyamin Netanyaxu bilan suhbatda uni Eronga javob zarbasi berishdan tiyilishga chaqirdi. Tehron Isroildan hujum bo‘lgan taqdirda kuchli qurollarini ishga solishidan ogohlantirdi.
Isroil armiyasi Eronga, albatta, kerakli vaqt va paytda javob qaytarilishi, bundan boshqa chora yo‘qligini e’lon qildi. AQSH mudofaa vaziri Lloyd Ostin isroillik hamkasbi Yoav Gallant bilan suhbatda vaziyatni keskinlashtirmaslikka chaqirdi. 19-aprelda esa Isroil Eronga javob hujumi uyushtirgani haqida xabarlar tarqaldi. Hozirda bu borada rasmiy ma’lumot e’lon qilinmagan.
Izoh (0)