Eron Islom inqilobi qo‘riqchilari korpusi Isroil rahbariyatiga murojaat yuborib, yadroviy inshootlarga hujum qilish haqida ogohlantirdi. Bu haqda Al Jazeera nashri xabar berdi.
Manbada aytilishicha, korpus rahbariyati, agar Isroil Eron ichkarisidagi obyektlarga hujum uyushtirsa va yadro inshootlari atrofida raketa uchirsa, bunga javoban Isroil hududidagi yadroviy obyektlarni bombardimon qilishini maʼlum qilgan. Islom inqilobi korpusi brigada generali Ahmad Hagtalab Tehron qo‘lida Isroil yadroviy inshootlari haqidagi maʼlumotlar borligini daʼvo qilgan.
“Sionistik dushmanning yadroviy inshootlari aniqlandi. Barcha nishonlar haqidagi kerakli maʼlumotlar bizning qo‘limizda”, — degan Eron Islom inqilobi qo‘riqchilari korpusi vakili.
Korpus vakili 2022-yil mart oyida Isroil tomonidan Eron yadroviy inshootlariga qilingan hujum masalasini tilga olgan. U, shuningdek, Tehronga yadroviy bomba qo‘lga kiritishdan tiyilish siyosatini qayta ko‘rib chiqishni taklif qilgan. Mamlakat havo kuchlari potensial yangi hujum uyushtirishga tayyor ekanligini maʼlum qilgan.
“Bizning barmoqlarimiz potensial hujumga javoban belgilangan nishonlarni yo‘q qilish uchun qudratli raketalarni ishga tushirishga tayyor”, — deyilgan xabarda.
Izoh (0)