AQSH prezidenti Jo Bayden Yaqin Sharqdagi vaziyat yanada avj olishiga yo‘l qo‘ymaslik maqsadida Isroilga Eronga javob qaytarishdan tiyilishni tavsiya qildi. Bu haqda amerikalik rasmiy manbalarga tayanib, The New York Times yozmoqda.
Manbalarga ko‘ra, Eronning 300 dan ortiq dron va raketalarining deyarli barchasi urib tushirilishi Isroil o‘zini himoya qilish qobiliyatini isbotlaganini ko‘rsatdi, ya’ni “o‘t ochish shart emas”. Bu faktning o‘zi “katta strategik g‘alaba”ni ifodalaydi, deydi AQSH rasmiylari.
“Isroil bunday misli ko‘rilmagan hujumlardan himoyalanishning hayratlanarli qobiliyatini namoyish qilib, dushmanlariga Isroil xavfsizligiga tahdid sola olmasligi haqida aniq signal berdi”, — degan Bayden Isroil bosh vaziri Binyamin Netanyaxu bilan suhbatda.
Biroq, nashrning yozishicha, qaror chiqarish Isroil qo‘lida. Hujum ko‘lami so‘nggi yillarda mamlakatlar o‘rtasida olib borilayotgan “soyadagi urush” doirasidan ancha uzoqlashgan.
Eron hujumi paytida ba’zi amerikalik siyosatchilar prezident va Isroil hukumatini keng ko‘lamli javob zarbasini berishga chaqirgan. Shu bilan birga, Amerikaning CNN nashri Isroil hukumati Eron hujumiga javob qaytarishni rejalashtirayotganini yozmoqda. Javob operatsiyasining ko‘lami hozircha noma’lum.
Ynet ma’lumotlariga ko‘ra, ehtimoliy ssenariylardan biri Eron yadroviy inshootlariga “zarar keltirishi” mumkin. Hozir isroillik harbiylar va siyosatchilar keskinlashuvga olib kelmaydigan javob choralarini ishlab chiqishga harakat qilmoqda, dedi nashr manbalari.
Izoh (0)