Toshkent shahrining Sergeli tumanidagi 277-maktabda boshlang‘ich sinf o‘qituvchisi o‘quvchilari qo‘liga igna va “samorez” sanchib, jazolab kelgani haqida xabar berilgandi. Shundan so‘ng o‘qituvchi ishdan olinib, holat tuman IIB tomonidan surishtirilayotgandi. O‘qituvchi zo‘ravonligini fosh qilgan onalardan biri o‘zini maktab direktorining o‘rinbosari deb tanishtirgan mas’ul tomonidan bosimga uchragan.
“Daryo”ga murojaat qilib, voqea haqida gapirgan onaning aytishicha, u bugun maktab binosida kaltaklangan.
Farzandimizning o‘qituvchisi o‘zgargach, bugungi dars qanday o‘tilar ekan deb kuzatishga bordik. Qarab tursak, o‘zini direktor o‘rinbosari deb tanishtirgan ayol kelib, bizni sinfxonadan haydashga kirishdi. Vakolatingizdan foydalanmang, bunaqa o‘zboshimchalik qilmang desam, menga zo‘ravonlik qila boshladi. Hatto qo‘l ko‘tardi, — deydi onalardan biri.
Ta’kidlanishicha, onalardan biriga qo‘l ko‘targan shaxs Sayyora Rashidova bo‘lib, u direktor o‘rinbosari ekanini aytsa-da, bu lavozimda ishlamasligi aniq bo‘lgan.
Men Sayyora Rashidova ismli maktab xodimining xatti-harakati yuzasidan IIBga murojaat qilib, ariza qoldirdim, — deydi ona.
Qo‘shimcha qilishicha, maktabning Sayyora Rashidova ismli xodimi onalarni maktab sirini ommaga ochiqlashda ayblab, ularni haqorat qilgan. Shuningdek, onalardan biriga qo‘l ko‘targan. Bu kameralarga ham tushgan.
Arizam IIB tomonidan ko‘rilib, maktab zo‘ravoniga tegishli chora ko‘riladi degan umiddaman. Maktabdagi Milliy gvardiya xodimlari zo‘rg‘a ajratib qolishdi. Yo‘qsa, bilmadim nima bo‘lardi. Bular ota-onalarga shunaqa munosabatda bo‘lsa, o‘quvchilar holi nima kechishini tasavvur qilavering, — deydi murojaatchi ona.
Eslatib o‘tamiz, voqea yuzasidan Sergeli tumani IIB tomonidan tergovga qadar tekshiruv olib borilayotgani xabar berilgandi. Natijalar haqida batafsil ma’lumot berilishi bildirilgan.
Izoh (0)