“Tolibon” harakati Isroil Damashqdagi Eron konsulliliga qilgan hujumiga javob Tehron javob qaytarishga haqli ekanini ma’lum qildi. Bu haqda Sputnik Afg‘oniston xabar berdi.
“Tolibon”ning Dohadagi muvaqqat ishlar vakili Muhammad Naim Vardak Eron o‘zini himoya qilish huquqiga ega ekanini ta’kidladi. Bunda Isroilning Yaqin Sharqdagi mojaroni kuchaytirish tarafdori ekanini inobatga olish kerakligini aytdi.
Afg‘oniston muvaqqat hukumati arab davlatlari va Eronni “yovuzlikka qarshi kurashish, ozod va mustaqil Falastinni qo‘llab-quvvatlash” uchun birdamlik va qat’iyatga chaqirdi.
Eron va Isroil o‘rtasidagi urush ehtimoli
Keng ko‘lamli urush boshlanishi ehtimoli Isroil 1-aprel kuni Eroning Damashqdagi konsulligiga hujum qilganidan so‘ng boshlandi. Hujum oqibatida 11 kishi, jumladan, 2016-yilgacha Livan va Suriyadagi “Quds” elita kuchlariga rahbarlik qilgan Eron harbiy maslahatchisi general Muhammad Rizo Zohidiy, uning o‘rinbosari general Muhammad Hodi Hoji Rahimiy va yana besh eronlik zobit ham halok bo‘ldi. Shuningdek, uch nafar Suriya va bir nafari Livan fuqarosi vafot etdi.
Eronning BMT missiyasi zarbani terakt deb baholadi. Eron tashqi ishlar vaziri Husayn Amir Abdullahiyon mazkur hujum munosabati bilan Amerika javobgarlikka tortilishi kerakligini aytdi. Shundan keyin AQSH razvedkasi Isroilni Eronning javob zarbalaridan ogohlantirdi. Buning fonida Isroil bir qator davlatlardagi elchixonalarini vaqtinchalik yopdi va xodimlarga ishga kelmaslik so‘raldi.
Netanyaxuning Eron tahdidiga javobi
Isroil bosh vaziri Binyamin Netanyaxu Eronning zarba berish tahdidiga javoban, ular har qanday ssenariyga tayyorliklarini aytdi.
Eron yillar davomida bizga qarshi bevosita va o‘z emissarlari orqali ishladi, shuning uchun ham Isroil Eron hamda uning emissarlariga qarshi mudofaa va hujumda faoliyat yuritdi. O‘zimizni qanday himoya qilishni bilamiz. Biz oddiy tamoyil asosida ish tutamiz – bizga zarar yetkazgan yoki shunday qilishni rejalashtirgan har kimga zarar yetkazamiz, — dedi Netanyaxu.
The New York Times manbalarga tayanib, Eron, Isroil va AQSH o‘z qurolli kuchlarini (oxirgi holatda gap Yaqin Sharqdagi qo‘shinlar haqida ketmoqda) jangovar shay holatga keltirganini xabar qildi. Jumladan, Isroil zaxiradagi havo hujumidan mudofaa kuchlarini chaqirib olgan, jangovar qismlardagi ta’tillar bekor qilingan.
Al Mayadeen nashriga ko‘ra, Eron Isroildagi strategik nuqtalarga o‘z bazalaridan dronlar va raketalar “yomg‘iri” bilan birgalikda hujum uyushtirishni rejalashtirmoqda.
O‘zbekiston Isroil hujumini qoraladi
O‘zbekiston Tashqi ishlar vazirligi bir necha insonlarning qurbon bo‘lishi va Eronning Damashq (Suriya) shahridagi diplomatik missiyasi hududida vayronagarchiliklarga olib kelgan Eron konsulligi binosiga uyushtirilgan havo hujumini keskin qoraladi.
Izoh (0)