“Толибон” ҳаракати Исроил Дамашқдаги Эрон консуллилига қилган ҳужумига жавоб Теҳрон жавоб қайтаришга ҳақли эканини маълум қилди. Бу ҳақда Sputnik Afg‘oniston хабар берди.
“Толибон”нинг Доҳадаги муваққат ишлар вакили Муҳаммад Наим Вардак Эрон ўзини ҳимоя қилиш ҳуқуқига эга эканини таъкидлади. Бунда Исроилнинг Яқин Шарқдаги можарони кучайтириш тарафдори эканини инобатга олиш кераклигини айтди.
Афғонистон муваққат ҳукумати араб давлатлари ва Эронни “ёвузликка қарши курашиш, озод ва мустақил Фаластинни қўллаб-қувватлаш” учун бирдамлик ва қатъиятга чақирди.
Эрон ва Исроил ўртасидаги уруш эҳтимоли
Кенг кўламли уруш бошланиши эҳтимоли Исроил 1 апрель куни Эронинг Дамашқдаги консуллигига ҳужум қилганидан сўнг бошланди. Ҳужум оқибатида 11 киши, жумладан, 2016 йилгача Ливан ва Суриядаги “Қудс” элита кучларига раҳбарлик қилган Эрон ҳарбий маслаҳатчиси генерал Муҳаммад Ризо Зоҳидий, унинг ўринбосари генерал Муҳаммад Ҳоди Ҳожи Раҳимий ва яна беш эронлик зобит ҳам ҳалок бўлди. Шунингдек, уч нафар Сурия ва бир нафари Ливан фуқароси вафот этди.
Эроннинг БМТ миссияси зарбани теракт деб баҳолади. Эрон ташқи ишлар вазири Ҳусайн Амир Абдуллаҳиён мазкур ҳужум муносабати билан Америка жавобгарликка тортилиши кераклигини айтди. Шундан кейин АҚШ разведкаси Исроилни Эроннинг жавоб зарбаларидан огоҳлантирди. Бунинг фонида Исроил бир қатор давлатлардаги элчихоналарини вақтинчалик ёпди ва ходимларга ишга келмаслик сўралди.
Нетаньяхунинг Эрон таҳдидига жавоби
Исроил бош вазири Биньямин Нетаньяху Эроннинг зарба бериш таҳдидига жавобан, улар ҳар қандай сценарийга тайёрликларини айтди.
Эрон йиллар давомида бизга қарши бевосита ва ўз эмиссарлари орқали ишлади, шунинг учун ҳам Исроил Эрон ҳамда унинг эмиссарларига қарши мудофаа ва ҳужумда фаолият юритди. Ўзимизни қандай ҳимоя қилишни биламиз. Биз оддий тамойил асосида иш тутамиз – бизга зарар етказган ёки шундай қилишни режалаштирган ҳар кимга зарар етказамиз, — деди Нетаньяху.
Тhе New York Times манбаларга таяниб, Эрон, Исроил ва АҚШ ўз қуролли кучларини (охирги ҳолатда гап Яқин Шарқдаги қўшинлар ҳақида кетмоқда) жанговар шай ҳолатга келтирганини хабар қилди. Жумладан, Исроил захирадаги ҳаво ҳужумидан мудофаа кучларини чақириб олган, жанговар қисмлардаги таътиллар бекор қилинган.
Аl Маyadeen нашрига кўра, Эрон Исроилдаги стратегик нуқталарга ўз базаларидан дронлар ва ракеталар “ёмғири” билан биргаликда ҳужум уюштиришни режалаштирмоқда.
Ўзбекистон Исроил ҳужумини қоралади
Ўзбекистон Ташқи ишлар вазирлиги бир неча инсонларнинг қурбон бўлиши ва Эроннинг Дамашқ (Сурия) шаҳридаги дипломатик миссияси ҳудудида вайронагарчиликларга олиб келган Эрон консуллиги биносига уюштирилган ҳаво ҳужумини кескин қоралади.
Изоҳ (0)