Kecha, 4-aprel kuni Eron Islom Respublikasining O‘zbekistondagi muxtor elchisi Muhammad Ali Iskandariy mahalliy ommaviy axborot vositalari va jurnalistlar bilan uchrashib, Eron-O‘zbekiston o‘rtasidagi munosabatlar va Yaqin Sharqda kechayotgan geosiyosiy vaziyat haqida gapirib o‘tdi.
Muhammad Ali Iskandariyning ta’kidlashicha, Isroil amalga oshirayotgan ishlari noto‘g‘ri ekanligini jahon hamjamiyati endi tushunib yetmoqda.
“Bundan 45 yil avval bizning rahbarimiz Oyatulloh Xomanaiy muborak ramazon oyining oxirgi juma kunini Muqaddas Quddus kuni deb eʼlon qilgan edi. 45 yil oldin Isroilning Falastinda amalga oshirayotgan jinoyatlari haqida Eron Islom Respublikasi bong urgandi. Bugun dunyoning barcha mamlakatlari Isroilning jinoyatlarini tan olmoqda. Falastin masalasi BMTning Xavfsizlik kengashida muhokama qilinishiga 45 yil vaqt ketdi. Isroil bir hafta ichida Falastindagi tinch aholi boshiga 6 mingdan ortiq bomba yog‘dirgan edi. Buning oqibatida Falastin xalqi juda katta jabr ko‘rdi.
Isroilning qilayotgan ishlari noto‘g‘ri ekanligini jahon hamjamiyati endi tushunib yetdi. Falastin xalqining boshiga tushgan kulfat Birinchi va Ikkinchi jahon urushi davrida ko‘rilgan talafotlardan ko‘proqdir. Isroil qo‘l urmagan hech bir jinoyat qolmadi. Isroil muqaddas kitoblardagi barcha narsalarni o‘chirib tashladi. Maʼlumotlarga ko‘ra, Isroilning harbiy amaliyoti davomida 120 mingdan oshiq tinch aholi qurbon bo‘lgan. Qurbon bo‘lganlarning 70 foizini bolalar va ayollar tashkil qiladi”, — dedi Muhammad Ali Iskandariy.
Eron Islom Respublikasi elchisining qo‘shimcha qilishicha, Eron Falastinda haqiqiy adolat o‘rnatilishini istaydi.
AQSH so‘nggi rusumdagi qurollarni Isroilga yetkazib berdi. Lekin Falastinda hatto qurol sotib olishga imkoniyat yo‘q edi. Isroilning yillar davomida amalga oshirib kelgan jinoyatlariga jahon hamjamiyati tomonidan hech qanday javob bo‘lmadi. Eron Islom Respublikasi Falastinda haqiqiy adolat o‘rnatilishini istaydi. U yerda bizning hech qanday iqtisodiy manfaatlarimiz yo‘q. Isroil davlatining ichida bo‘linish mavjud, bu mamlakat yaqin orada tanazzulga yuz tutadi. Ulkan harbiy qudratga ega bo‘lgan Isroil 7 ming nafar HAMAS jangarilarini mag‘lub eta olmadi. O‘rgimchak o‘z uyasining oxirgi qismiga yetib kelmoqda va u o‘z to‘riga o‘ralib, nobud bo‘ladi. Inshoolloh, biz Isroilning qulashiga guvoh bo‘lamiz. Albatta, Falastin mamlakati o‘z huquqlariga ega bo‘ladi”, — dedi Eron Islom Respublikasining O‘zbekistondagi muxtor elchisi.
Ma’lumot o‘rnida, joriy yilning 1-aprel kuni tunda Isroil harbiy-havo kuchlari Suriya poytaxti Damashq shahrida joylashgan Eron elchixonasi va konsulligiga raketa zarbasini amalga oshirdi. Eron tashqi ishlar vaziri Husayn Amir Abdullahiyon mazkur hujum munosabati bilan Amerika javobgarlikka tortilishi kerakligini aytdi. Hujum oqibatida 11 kishi, jumladan, 2016-yilgacha Livan va Suriyadagi “Quds” elita kuchlariga rahbarlik qilgan Eron harbiy maslahatchisi general Muhammad Rizo Zohidiy, uning o‘rinbosari general Muhammad Hodi Hoji Rahimiy va yana besh nafar eronlik zobit ham halok bo‘lgan.
O‘zbekiston Tashqi ishlar vazirligi bir necha insonlarning qurbon bo‘lishi va Eronning Damashq (Suriya) shahridagi diplomatik missiyasi hududida vayronagarchiliklarga olib kelgan Eron konsulligi binosiga uyushtirilgan havo hujumini keskin qoraladi.
Izoh (0)