Makroiqtisodiy va hududiy tadqiqotlar instituti (MHTI) Toshkentdagi yirik supermarketlarda oziq-ovqat mahsulotlari narxini o‘rgandi.
Qayd etilishicha, MHTI mutaxassislari aprel oyida Toshkent shahridagi yirik supermarketlarda 21 nomdagi oziq-ovqat mahsulotlari narxining o‘zgarishini ko‘rib chiqqan.
Monitoring natijalari 6 xil mahsulot bo‘yicha minimal narxlar o‘tgan oydagiga nisbatan pasayganini ko‘rsatgan. Shunday qilib, limon narxi 18,8 foiz, bodring narxi 17,6 foiz, tuxumning narxi 17,3 foiz, bananning narxi 13,5 foiz, tovuq go‘shtining (file) narxi 6,8 foiz, sariq piyozning narxi 5,4 foiz pasaygan.
Shuningdek, 8 nomdagi mahsulotlarning eng past narxi o‘zgarishsiz qolgan. Bular: bug‘doy uni, guruch, grechka, makaron, shakar, karam, margarin, kungaboqar yog‘i.
7 nomdagi mahsulotlar narxi oshgan. Narxining oshishi bo‘yicha pomidor yetakchi bo‘lgan. “Bu esa mavsumiy omil bilan bog‘liq”, — deyiladi xabarda.
Eslatib o‘tamiz, 2023-yil may oyida O‘zbekiston Markaziy banki 2023-yil birinchi choragi uchun “Iste’mol kayfiyati sharhi”ni e’lon qilgandi. Tadqiqotda respondentlarning daromadlari va xarajatlari, ularning jamg‘armaga moyilligi, shuningdek, kelajakdagi ehtiyojlari tahlil qilingan. Euromonitor International ma’lumotlariga ko‘ra, o‘zbekistonliklar daromadining 46,5 foizini oziq-ovqatga sarflaydi.
Izoh (0)