“Dam olish kunlari xodimlarni majburiy ishga jalb qilish jinoiy javobgarlikkacha olib borishi mumkin” — huquqshunos

Huquqshunos Saydali Muxtoraliyevning tushuntirishicha, rahbarlar xodimni dam olish vaqtida ishga jalb qilishi juda nozik masala ekanini bilishi shart.

“Gap shundaki, dam olish va ishlanmaydigan bayram kunlari xodimlarni asossiz ishga jalb qilish qonunbuzarlikdir.

Buning uchun Ma’muriy javobgarlik to‘g‘risidagi kodeksning 49-moddasiga asosan BHMning 10 barobarigacha (3 million 30 ming so‘m), agar bu harakat bir yil davomida takroran sodir etilgan bo‘lsa BHMning 15 barobari (4 million 950 ming so‘m ) miqdorida ma’muriy jarima bor.

Agar rahbariyatning bu harakatlarida mehnatga majburlash alomatlari bo‘ladigan bo‘lsa, vaziyat yanada og‘irlashadi. Bunda rahbarlar Ma’muriy javobgarlik to‘g‘risidagi kodeksning 51-moddasiga asosan BHMning 100 barobarigacha (33 million so‘m), agar bu pedagoglarga nisbatan sodir qilingan bo‘lsa, BHMning 150 baravarigacha (49 million 500 ming so‘m) ma’muriy jarimaga tortilishi mumkin. Agar bu huquqbuzarlik, ya’ni mehnatga majburlash uchun ma’muriy jazo qo‘llanilganidan keyin yana takrorlansa, bu yog‘i jinoyatga tortib ketadi. Bunday holatlarda Jinoyat kodeksining 148-2-moddasiga asosan jinoiy javobgarlik choralari qo‘llanilishi mumkin”, — deydi huquqshunos.

Saydali Muxtoraliyevning alohida ta’kidlashicha, tashkilot rahbarlari dam olish, ishlanmaydigan bayram kunlarida xodimlarni ishga chaqirishda ogoh bo‘lishlari lozim.