Andijon viloyati maktabgacha va maktab taʼlimi tizimidagi yaroqsiz holatda bo‘sh turgan davlat mulki obyektlari buziladi. Viloyat hokimi Shuhrat Abdurahmonovning shu boradagi tegishli qarori qabul qilingan.
Andijon viloyati Qurilish sohasida nazorat inspeksiyasi xulosasi hamda Maktabgacha va maktab taʼlimi boshqarmasi xatiga asosan qabul qilingan qarorga ko‘ra, 20 ta bog‘cha va maktab binosi buziladi. Hujjatda taʼlim boshqarmasi binolarni buzishdan olingan yaroqli materiallarni balansda saqlovchi tashkilotlarga kirim qilishni taʼminlashi belgilangan. Buzilishdan bo‘shagan yer maydonlari taʼlim boshqarmasi balansida qoldiriladi.
Buzilishi belgilangan binolar viloyat bo‘yicha 20 ta bo‘lib, shulardan ikkitasi Andijon shahrida joylashgan. Andijon tumanida — bitta, Asakada, Bo‘ston, Jalaquduq, Marhamat va Oltinko‘lda — ikkitadan, Shahrixonda esa uchta obyekt buziladi. Shuningdek, Paxtaobod, Xo‘jaobod, Izboskan, Qo‘rg‘ontepada bittadan bino buziladi.
Binolarning eng eskisi 1937-yilda, yana ikkitasi 1938-yilda qurilgan. Yaroqsiz holatga kelib qolgan binolar orasida 1985-yilda qurilgan maktabgacha ta’lim tashkiloti inshooti ham mavjud.
Fevral oxirlarida ijtimoiy tarmoqlarda usta-quruvchilar Buxoro ixtisoslashtirilgan sanʼat maktabidagi musiqa asbobi (pianino)ning ustiga chiqib, jamoatchilikning eʼtirozlariga sabab bo‘luvchi xatti-harakatlarni sodir etgani haqida xabarlar tarqalgandi.
Izoh (0)