Qirg‘iziston prezidenti Sadir Japarov Qozog‘istonga tashrif buyuradi. Bu haqda 24.kg xabar berdi.
Japarovning matbuot xizmati xabariga ko‘ra, u 18—19-aprel kunlari rasmiy tashrif bilan Qozog‘istonda bo‘ladi. Shu bilan birga, Qirg‘izistonning Qozog‘istondagi elchisi Dastan Dyushekeyev jurnalistlarga tashrif doirasida ikki davlat rahbarlari Oliy davlatlararo kengash yig‘ilishini o‘tkazishini ma’lum qildi. Tomonlar ikki tomonlama hamkorlikning dolzarb masalalarini muhokama qiladi.
Bundan tashqari, Japarov Qozog‘istonda Qirg‘iziston kinosi kunlarining ochilishi va boshqa qator tadbirlarda ishtirok etadi.
Avvalroq Qozog‘iston prezidenti Qosim-Jo‘mart To‘qayev qirg‘izistonlik hamkasbi bilan telefon orqali muloqoti chog‘ida suv toshqinlari munosabati bilan ko‘rsatilayotgan birodarlik yordami uchun unga va Qirg‘iziston xalqiga minnatdorlik bildirgan edi.
Jumladan, Qirg‘iziston suv toshqinlaridan jabrlangan Qozog‘istonga 300 tonna gumanitar yordam yuborgan. U kungaboqar yog‘i, shakar, guruch, makaron va qandolat mahsulotlari, matraslar, kiyim-kechak va chodirlarni o‘z ichiga oladi.
Izoh (0)