Xitoy—Qirg‘iziston—O‘zbekiston temiryo‘li qurilishi 8 milliard dollarga baholanmoqda. Bu haqda Qirg‘iziston Vazirlar Mahkamasi raisi Oqilbek Japarovga tayanib 24.kg xabar berdi.
Japarovning so‘zlariga ko‘ra, tegishli summa dastlabki narx hisoblanadi. Qirg‘iziston, Xitoy va O‘zbekiston temiryo‘l qurilishini boshlashga tayyorgarlik ko‘rish ishlarini yakunlagan. Barcha protseduralar bajarilgan. Ishlar joriy yilda boshlanishi kutilmoqda. Hozirda loyihaning texnik-iqtisodiy asoslarini amalga oshirish ketmoqda.
O‘zbekiston—Qirg‘iziston—Xitoy temiryo‘li qurilishi loyihasi bo‘yicha uch davlat o‘rtasida hamkorlik to‘g‘risidagi bitim 2022-yil sentyabr oyida Samarqandda imzolangandi. Hujjatda loyihaning texnik-iqtisodiy asoslarini o‘tgan yilning birinchi yarmida tayyorlash ko‘zda tutilgandi.
2023-yil dekabr oyida Xitoydan kelgan mutaxassislar yangi temiryo‘l yo‘nalishida dala ishlarini yakunlagan. 20 yildan ortiq muhokama qilinayotgan loyihaning amalga oshirilishi Xitoydan O‘zbekiston orqali Yevropa va “Janubiy yo‘lak” orqali Fors ko‘rfazi davlatlariga savdo va transport geografiyasini kengaytirish uchun asos bo‘lib xizmat qilishi kutilmoqda.
Izoh (0)