O‘zbekiston va Tojikiston mutaxassislari hamkorligida chegara hududlarida zararli chigirtkaga qarshi monitoring olib borildi. Bu haqda Qishloq xo‘jaligi vazirligi matbuot xizmati xabar berdi.
Qayd etilishicha, uch kun davomida ikki davlatning chegaradosh hududlarida zararli chigirtkalarni rivojlanishi va tarqalgan o‘choqlarini aniqlash maqsadida Tojikistonning Rudakiy, Shaxritus, Nosiri Hisrav tumanlarining chegara hududlarida va O‘zbekistonning Uzun, Jarqo‘rg‘on, Qumqo‘rg‘on, Sho‘rchi va Termiz tumanlarida zararli chigirtkalarni tarqalishi, rivojlanishi va kurash tadbirlarini bajarilishi bo‘yicha kuzatuvlar amalga oshirilgan.
Cho‘l zonalarda olib borilgan monitoring tadbirlari bilan birgalikda hamkorlik to‘g‘risida kelishuv imzolangan. Tomonlar chegaradosh hududlarda fitosanitariya holati, chigirtkalar tarqalishining prognozi va kimyoviy ishlov berish hajmi to‘g‘risidagi axborot almashinuvini yo‘lga qo‘yish hamda chegaradosh bo‘lgan hududlarda zararli chigirtkalarning tarqalish xavfi yuzaga kelsa qarshi kurash tadbirlarini o‘z muddatida olib borishga kelishib olingan.
Ma’lumot uchun, 2024-yilda 574,8 gektar maydonda kimyoviy ishlov o‘tkazilishi prognozi qilingan. Barcha texnika shay holga keltirilib, jami 185 ta traktor (OVX va VP-1) purkagichlar, 435 ta motorli qo‘l apparatlari, 31 ta yuqori unumli purkagichli maxsus avtomashinalar, 25 ta suv tashish texnikalari qarshi kurash tadbirlarini olib borish uchun hozirlangan.
Eslatib o‘tamiz, 2022-yilning may oyida ijtimoiy tarmoqlarda Qashqadaryo viloyatining Dehqonobod tumanidagi ekin maydonlarini chigirtka to‘dasi bosgani aytilgan video tarqalgandi. Keyinroq tuman hokimligi holatga munosabat bildirib, Turkmanistondan kirib kelgan chigirtkalar qishloq xo‘jaligiga zarar yetkazmasligini ma’lum qilgan.
Izoh (0)