Qozog‘istonda suv toshqini tufayli deyarli 64 ming kishi evakuatsiya qilindi. Bu haqda Respublika Favqulodda vaziyatlar vazirligi Favqulodda vaziyatlarda harakat qilish boshqarmasi boshlig‘i Qaharman Orazalin ma’lum qildi.
Aqto‘be, Qo‘stanay, Pavlodar, Aqmola, Atirau va Shimoliy Qozog‘iston viloyatlarida 3391 ta xususiy uy, 1059 ta dalahovli va 79 ta turli maqsadlardagi binolar suv ostida qolmoqda.
“Ayni paytda umumiy kuchlarimiz tomonidan 63 ming 927 nafar fuqaro qutqarilib, evakuatsiya qilingan, ulardan 45 nafari imkoniyati cheklangan, 15 ming 283 nafari esa bolalardir”, — dedi Qaharman Orazalin.
Fuqarolarni vaqtinchalik joylashtirish markazlarida 13 328 nafar kishi bor, shundan 6 742 nafari bolalar. Ular barcha zarur narsalar bilan ta’minlangan, psixologlar faoliyat yuritmoqda, barcha zarur yordam ko‘rsatilmoqda.
“Qutqaruv operatsiyasi juda og‘ir sharoitda o‘tdi. Tom ma’noda, odamlarni uylarning tomidan evakuatsiya qilish kerak edi, maxsus jihozlar va yuk ko‘targichlar qo‘llandi”, — deya qo‘shimcha qildi rasmiy.
Qozog‘istonda suv toshqini bilan bog‘liq vaziyat og‘irligicha qolmoqda. 6-aprel kuni prezident Qosim-Jo‘mart To‘qayev Qozog‘iston xalqiga murojaat qildi. Uning so‘zlariga ko‘ra, hozirgi vaziyat, ehtimol, miqyosi va oqibatlari bo‘yicha so‘nggi 80 yildan ortiq vaqt mobayniyda kuzatilgan eng katta ofatdir.
Suv toshqinlari sababli mamlakatning o‘nta viloyatida (Abay, Aqmo‘la, Aqto‘be, Atirau, G‘arbiy Qozog‘iston, Qarag‘anda, Qo‘stanay, Pavlodar, Shimoliy Qozog‘iston va Ulitov viloyatlari) mahalliy darajadagi favqulodda holat e’lon qilingan.
Izoh (0)