Turkiya tashqi ishlar vaziri Xoqon Fidan sulh bo‘yicha kelishuvga erishilmasa, mamlakat Isroilga qarshi bir qancha jiddiy choralar ko‘rishini maʼlum qildi. Bu haqda Anadolu nashri xabar berdi.
“Prezident tomonidan tasdiqlangan ushbu chora-tadbirlar bosqichma-bosqich, kechiktirmasdan amalga oshiriladi. Bu chora-tadbirlar tegishli idoralar tomonidan jamoatchilikka yetkaziladi”, — degan Xoqon Fidan rasmiy bayonotida.
Tashqi ishlar vazirining taʼkidlashicha, Turkiya G‘azoga havodan yordam jo‘natmalari yetkazish ishlarida ishtirok etishni so‘ragan. Iordaniya bu taklifni maʼqullagan, biroq Isroil rad etgan.
Anqara tomonidan shu paytga qadar G‘azoga jo‘natilgan gumanitar yordam hajmi 42 ming tonnadan oshgani xabar qilingan. Yordam yuklari asosan Misr chegarasidagi Rafah o‘tkazish punkti orqali olib kirilgan.
Xoqon Fidan endilikda Turkiyaning Isroilga nisbatan siyosati yanada keskinlashishiga ishora qilgan. Mamlakat rasmiylarini yana bir bor tinchlik muzokaralariga qaytishga chaqirgan.
Maʼlumot o‘rnida,
- Isroilning G‘azo sektoriga uyushtirgan hujumlarida shu paytga qadar kamida 33 207 nafar falastinlik halok bo‘lgan.
- G‘azodagi manbalar aholining 85 foizi majburiy (ichki) ko‘chirilganini maʼlum qilgan.
- Anklav infratuzilmasining 60 foizi shikastlangan yoki vayron bo‘lgan.
- Xalqaro hamjamiyat qarshiligiga qaramay, Isroil harbiy operatsiyani davom ettirmoqda.
Izoh (0)