Isroil hujumi oqibatida “Hizbulloh” qo‘mondoni halok bo‘ldi — CNN

Isroil mudofaa kuchlari 8-aprel kuni Livan hududiga uyushtirgan hujumda “Hizbulloh” guruhining qo‘mondonlaridan biri halok bo‘ldi. Bu haqda CNN nashri xabar berdi.

Xabarga ko‘ra, Isroil mudofaa kuchlari Livan janubidagi bir qator nuqtalarga zarba bergan. Hujumlarda Livan “Hizbulloh”ining ikki nafar askari hamda tashkilot tarkibidagi Al-Radvan maxsus operatsiyalar bo‘linmasi qo‘mondoni Ali Ahmad Husayn halok bo‘lgan.

Qo‘mondonning o‘limini “Hizbulloh” rasmiylari ham rasman tasdiqlagan. Qo‘mondon vafotiga Isroilning kutilmagan hujumi sabab bo‘lgani aytilgan.

Ushbu voqea “Hizbulloh” rahbariyati vakili vafot etishi bilan bog‘liq ikkinchi holatdir. Mart oyi boshida ham Livan janubidagi hujumlarda guruh yetakchilaridan biri yo‘q qilingani Isroil harbiy maʼmuriyati tomonidan maʼlum qilingan edi.

Livan Milliy axborot agentligi maʼlumotlariga ko‘ra, Isroilning so‘nggi hujumi hududdagi binolarga katta zarar yetkazgan. 10 dan ortiq oila uy-joyidan ayrilgan.