“Ўт очишни тўхтатишга эришилмаса, Исроилга қарши жиддий чоралар кўришни бошлаймиз” — Туркия ташқи ишлар вазири

Туркия ташқи ишлар вазири Хоқон Фидан сулҳ бўйича келишувга эришилмаса, мамлакат Исроилга қарши бир қанча жиддий чоралар кўришини маълум қилди. Бу ҳақда Anadolu нашри хабар берди.

“Президент томонидан тасдиқланган ушбу чора-тадбирлар босқичма-босқич, кечиктирмасдан амалга оширилади. Бу чора-тадбирлар тегишли идоралар томонидан жамоатчиликка етказилади”, — деган Хоқон Фидан расмий баёнотида.

Ташқи ишлар вазирининг таъкидлашича, Туркия Ғазога ҳаводан ёрдам жўнатмалари етказиш ишларида иштирок этишни сўраган. Иордания бу таклифни маъқуллаган, бироқ Исроил рад этган.

Анқара томонидан шу пайтга қадар Ғазога жўнатилган гуманитар ёрдам ҳажми 42 минг тоннадан ошгани хабар қилинган. Ёрдам юклари асосан Миср чегарасидаги Рафаҳ ўтказиш пункти орқали олиб кирилган.

Хоқон Фидан эндиликда Туркиянинг Исроилга нисбатан сиёсати янада кескинлашишига ишора қилган. Мамлакат расмийларини яна бир бор тинчлик музокараларига қайтишга чақирган.

Маълумот ўрнида,

• Исроилнинг Ғазо секторига уюштирган ҳужумларида шу пайтга қадар камида 33 207 нафар фаластинлик ҳалок бўлган.
• Ғазодаги манбалар аҳолининг 85 фоизи мажбурий (ички) кўчирилганини маълум қилган.
• Анклав инфратузилмасининг 60 фоизи шикастланган ёки вайрон бўлган.
• Халқаро ҳамжамият қаршилигига қарамай, Исроил ҳарбий операцияни давом эттирмоқда.