“Barselona” hujumchisi Joau Feliks “PSJ” hujumchisi Kilian Mbappening o‘yiniga yuqori baho berdi.
“U, ehtimol, dunyoning eng yaxshi hujumchisi. Menga uning o‘yini yoqadi. U to‘pni qabul qilishda yoki ochiq hududga yugurishda juda tez va foydali. Boshqacha aytganda, u juda sermahsul va qaysi jamoada o‘ynamasin boshqalardan farq qiladi.
Mbappe yoki Usmon Dembele? Ularning ikkalasi ham juda zo‘r, lekin futbol bu jangovar o‘yin. Biz ular va “PSJ”ning qolgan barcha futbolchilarini to‘xtatish uchun yaxshi himoyalanishimiz kerak bo‘ladi”, — deya Feliks so‘zlarini keltiradi Catalunya Ràdio.
Mbappe 2017-yildan beri “PSJ”da o‘ynab kelmoqda. 25 yoshli futbolchi parijliklar bilan 13 ta sovrin yutgan. Joriy mavsumda forvard barcha turnirlarda 39 ta o‘yin o‘tkazib, 39 ta gol va 8 ta golli uzatmani amalga oshirdi. Futbolchining fransuz klubi bilan shartnomasi shu yilning iyun oyi oxirigacha amal qiladi. Transfermarkt internet portaliga ko‘ra futbolchining taxminiy narxi 180 million yevroni tashkil qiladi.
OAVda tarqalgan xabarlariga ko‘ra, Mbappe kelasi yozgi transfer oynasida “Real”ga o‘tishi mumkin.
“PSJ” va “Barselona” Chempionlar Ligasining chorak finalida o‘zaro bahs olib boradi. Birinchi o‘yin 10-aprel kuni Parijda bo‘lib o‘tadi. Javob o‘yini 16-aprel kuni Ispaniyada bo‘lib o‘tadi.
Izoh (0)