“Барселона” ҳужумчиси Жоау Феликс “ПСЖ” ҳужумчиси Килиан Мбаппенинг ўйинига юқори баҳо берди.
“У, эҳтимол, дунёнинг энг яхши ҳужумчиси. Менга унинг ўйини ёқади. У тўпни қабул қилишда ёки очиқ ҳудудга югуришда жуда тез ва фойдали. Бошқача айтганда, у жуда сермаҳсул ва қайси жамоада ўйнамасин бошқалардан фарқ қилади.
Мбаппе ёки Усмон Дембеле? Уларнинг иккаласи ҳам жуда зўр, лекин футбол бу жанговар ўйин. Биз улар ва “ПСЖ”нинг қолган барча футболчиларини тўхтатиш учун яхши ҳимояланишимиз керак бўлади”, — дея Феликс сўзларини келтиради Cаталуня Рàдио.
Мбаппе 2017 йилдан бери “ПСЖ”да ўйнаб келмоқда. 25 ёшли футболчи парижликлар билан 13 та соврин ютган. Жорий мавсумда форвард барча турнирларда 39 та ўйин ўтказиб, 39 та гол ва 8 та голли узатмани амалга оширди. Футболчининг француз клуби билан шартномаси шу йилнинг июнь ойи охиригача амал қилади. Transfermarkt интернет порталига кўра футболчининг тахминий нархи 180 миллион еврони ташкил қилади.
ОАВда тарқалган хабарларига кўра, Мбаппе келаси ёзги трансфер ойнасида “Реал”га ўтиши мумкин.
“ПСЖ” ва “Барселона” Чемпионлар Лигасининг чорак финалида ўзаро баҳс олиб боради. Биринчи ўйин 10 апрель куни Парижда бўлиб ўтади. Жавоб ўйини 16 апрель куни Испанияда бўлиб ўтади.
Изоҳ (0)