O‘zbekistonda 2024-yilda jami 2 076 ta masjidda hayit namozlari o‘qiladi. Ularda fuqarolar xavfsizligini ta’minlashga minglab xodimlar va harbiy xizmatchilar jalb etilgan.
IIV Jamoat xavfsizligi departamenti axborot xizmati rahbari Muzifa Sultonova ma’lum qilishicha, ushbu masjidlarda jamoat tartibini saqlash va fuqarolar xavfsizligini ta’minlashga jami 12 374 nafar ichki ishlar organlari, 2 771 nafar Milliy gvardiya va 2 622 nafar FVV xodimlari va harbiy xizmatchilari jalb etilgan.
Ularga xizmatda foydalanish uchun 7 352 ta aloqa va 2 433 ta avtotransport vositalari, 4 845 ta metallodetektor biriktirildi hamda 372 ta xizmat itlari ajratildi.
Shuningdek, respublikadagi barcha YPX maskanlarining ish faoliyati kuchaytirilgan tartibga o‘tkazildi.
Hayit namozi uchun masjidlarga kirish joylarda beton yoki metall to‘siqlar o‘rnatilgan holda, masjidlardan 150 metr uzoqlikda alohida avtoturargohlar tashkil etildi.
Respublika hududida 100 dan ortiq obyektlar — bozorlar, yirik savdo va ko‘ngilochar dam olish majmualari hamda fuqarolar gavjum bo‘ladigan boshqa joylarda jamoat tartibini saqlash va jamoat xavfsizligini ta’minlash maqsadida taqsimotga asosan mingdan ortiq IIV va Milliy gvardiyaning hududiy bo‘linmalari shaxsiy tarkibi, shuningdek, kinolog xodimlar 100 dan ortiq xizmat itlari bilan xizmatga jalb etilgan.
Ta’kidlanishicha, majmualarda o‘rnatilgan barcha videokuzatuv kameralari ichki ishlar organlarining situatsion markazlariga integratsiya qilinib, tun-u kun nazorat qilinmoqda.
Izoh (0)