Ўзбекистонда 2024 йилда жами 2 076 та масжидда ҳайит намозлари ўқилади. Уларда фуқаролар хавфсизлигини таъминлашга минглаб ходимлар ва ҳарбий хизматчилар жалб этилган.
ИИВ Жамоат хавфсизлиги департаменти ахборот хизмати раҳбари Музифа Султонова маълум қилишича, ушбу масжидларда жамоат тартибини сақлаш ва фуқаролар хавфсизлигини таъминлашга жами 12 374 нафар ички ишлар органлари, 2 771 нафар Миллий гвардия ва 2 622 нафар ФВВ ходимлари ва ҳарбий хизматчилари жалб этилган.
Уларга хизматда фойдаланиш учун 7 352 та алоқа ва 2 433 та автотранспорт воситалари, 4 845 та металлодетектор бириктирилди ҳамда 372 та хизмат итлари ажратилди.
Шунингдек, республикадаги барча ЙПХ масканларининг иш фаолияти кучайтирилган тартибга ўтказилди.
Ҳайит намози учун масжидларга кириш жойларда бетон ёки металл тўсиқлар ўрнатилган ҳолда, масжидлардан 150 метр узоқликда алоҳида автотураргоҳлар ташкил этилди.
Республика ҳудудида 100 дан ортиқ объектлар — бозорлар, йирик савдо ва кўнгилочар дам олиш мажмуалари ҳамда фуқаролар гавжум бўладиган бошқа жойларда жамоат тартибини сақлаш ва жамоат хавфсизлигини таъминлаш мақсадида тақсимотга асосан мингдан ортиқ ИИВ ва Миллий гвардиянинг ҳудудий бўлинмалари шахсий таркиби, шунингдек, кинолог ходимлар 100 дан ортиқ хизмат итлари билан хизматга жалб этилган.
Таъкидланишича, мажмуаларда ўрнатилган барча видеокузатув камералари ички ишлар органларининг ситуацион марказларига интеграция қилиниб, тун-у кун назорат қилинмоқда.
Изоҳ (0)