“Rossiya Serbiya kelajagining ajralmas qismi bo‘lib qoladi” — Serbiya sotsialistlar harakati rahbari

Serbiya xavfsizlik va axborot agentligi sobiq rahbari Aleksandr Vulin mamlakatning kelajagi Rossiya bilan munosabatlarga to‘la bog‘liq ekanligini maʼlum qildi. Bu haqda “TASS” nashri xabar qildi.

Aleksandr Vulin Rossiyani Serbiya integratsiyasi va suverenitetining kafolatlaridan biri deya tilga olgan. Buning isboti sifatida esa Kosovo mojarosida Moskva Belgradni qo‘llab-quvvatlaganini keltirgan.

“O‘zini Kosovo deb atagan davlatning Yevropa Kengashiga aʼzolikka intilishiga bildirilgan munosabat Serbiyaga munosabatdir. Yevropa Ittifoqining aksariyat aʼzolari va Bryussel maʼmuriyatining barcha rasmiylari Kosovo deb atalmish davlatni yoqlab ovoz berishmoqda. Bu Serbiyaga qarshi ovoz berishdir. O‘zining barcha muammolariga qaramay, Rossiya bizni yana bir bor qo‘llab-quvvatladi. Agar Rossiya hali ham Yevropa Kengashi aʼzosi bo‘lganida, Kosovo deb ataladigan hudud nomi tilga olinmagan bo‘lardi”, — degan Serbiya rasmiysi.

Aleksandr Vulin serb jamiyatini Rossiya haqidagi “uydirma”larga ishonmaslikka chaqirgan. Rossiya bo‘lmasa, Belgrad uchun tenglik va adolat bo‘lmasligini bildirgan.

“Rossiya bo‘lmagan joyda Serbiya uchun adolat yo‘q. Serblar, buni tushunmaysizlarmi?” — degan Vulin.

Yevropa Kengashi Parlament assambleyasi siyosiy qo‘mitasi 27-mart kuni Parijda yig‘ilib, o‘zini Serbiyadan mustaqil deb eʼlon qilgan Kosovaning tashkilotga aʼzo bo‘lish haqidagi arizasini ko‘rib chiqqan edi. Serbiya tashqi ishlar vaziri Ivitsa Dachich bu holatga munosabat bildirib, tan olinmagan Kosovoni Yevropa Kengashiga aʼzo bo‘lishga taklif qilish qarori “sharmandali, janjalli va Yevropa Kengashining barcha tamoyillarini buzuvchi” qaror ekanligini bildirgan.