Oliy Majlis Senati raisi Tanzila Norboyeva 8-aprel kuni O‘zbekistonda amaliy tashrif bilan mehmon bo‘lib turgan Gruziya Parlamenti raisi Shalva Papuashvili boshchiligidagi delegatsiya bilan uchrashuv o‘tkazdi. Bu haqda Senat matbuot xizmati xabar berdi.
Mamlakatlar o‘rtasidagi savdo-iqtisodiy va investitsiyaviy hamkorlikni kengaytirish, madaniy-gumanitar almashinuvni faollashtirish, parlamentlararo munosabatlarni yangi bosqichga olib chiqish masalalari ko‘rib chiqildi.
2023-yilda tovar ayirboshlash 23 foizga oshdi. Muloqot chog‘ida ikkala davlat ham o‘zidagi bor salohiyat va imkoniyatni ishga solish, transport-logistika, bank-moliya, turizm kabi yo‘nalishlarda qo‘shma loyihalarni amalga oshirish yuzasidan fikr almashildi.
Muloqot chog‘ida xalqlarimizni bir-biriga yaqinlashtirishda madaniy-gumanitar aloqalarni faollashtirishga eʼtibor qaratildi. O‘zbekiston va Gruziya xalqlarini anʼanaviy mustahkam do‘stlik rishtalari bog‘lab turishi, madaniy tadbirlarning tez-tez o‘tkazilishi ruhi va anʼanalari jihatidan juda yaqin xalqlar munosabatlarini rivojlantirishga xizmat qilishi taʼkidlab o‘tildi.
Ikki mamlakat o‘rtasida erishilgan oliy darajadagi kelishuvlarning samarali amalga oshirilishini taʼminlash uchun parlamentlar o‘rtasida muntazam muloqotni yo‘lga qo‘yish, bu jarayonda parlamentlararo do‘stlik guruhlarining muvofiqlashtiruvchi sifatidagi rolini yanada oshirishga eʼtibor qaratildi.
Uchrashuvda gender tenglik, hududlar o‘rtasida aloqalarni mustahkamlash, xalqaro tashkilotlar doirasida hamkorlikni rivojlantirishga kelishib olindi.
Izoh (0)