Oliy Majlis Senati raisi Tanzila Norboyeva boshchiligidagi O‘zbekiston parlamenti delegatsiyasi Jeneva shahrida Qo‘shilmaslik harakati parlament tarmog‘ining “Iqlim o‘zgarishiga qarshi kurashishda parlament faoliyatini kuchaytirish” mavzusidagi uchinchi konferensiyasida ishtirok etdi. Bu haqda Senat matbuot xizmati xabar berdi.
Maʼlum qilinishicha, tashkilotda ishtirok etuvchi parlamentlar va xalqaro tuzilmalardan 53 ta delegatsiya hozir bo‘lgan anjuman davomida iqlim o‘zgarishiga qarshi kurashishda parlamentlarning rolini kuchaytirishga qaratilgan qator strategiya va yondashuvlar muhokama qilingan.
Iqlim o‘zgarishi jamoaviy harakatlarni talab qiladigan zamonamizning global muammolaridan biri bo‘lib qolayotgani, bugun qabul qilinadigan qarorlar kelajak avlodlarga uzoq muddat taʼsir ko‘rsatishi aytib o‘tilgan.
Issiqxona gazlari chiqindilarini kamaytirish, aholining xabardorlik darajasini oshirish, barqaror ekologik siyosat sohasida xalqaro hamkorlikni rivojlantirishga qaratilgan namunaviy qonunlarni ishlab chiqish bo‘yicha parlamentlarning saʼy-harakatlarini birlashtirish lozimligiga eʼtibor qaratilgan.
Oliy Majlis Senati raisi o‘z nutqida jahon mamlakatlari parlamentlari, birinchi navbatda, inson omilining sayyoramizga salbiy taʼsirini imkon qadar kamaytirish bo‘yicha shoshilinch choralar ko‘rish uchun masʼuliyatni o‘z zimmasiga olishi zarurligini taʼkidlagan.
Shuningdek, ekologik muammolarni hal qilishda parlamentlardan talab etiladigan zarur jihatlar sanab o‘tildi. Ekologiya va iqlim o‘zgarishi sohasiga doir qonun hujjatlarini uyg‘unlashtirish bo‘yicha mamlakatlar parlamentlari o‘rtasidagi hamkorlikni mustahkamlash, global o‘rtacha haroratning o‘sishini Selsiy bo‘yicha 2 darajadan past darajada ushlab turishga erishish va Parij bitimini amalga oshirishni qo‘llab-quvvatlash shular jumlasidan.
Shu bilan birga, Senat raisi ishtirokchilar eʼtiborini “yashil” texnologiyalar va tegishli infratuzilmaga investitsiyalar kiritish uchun qulay shart-sharoitlar yaratish zarurligiga qaratgan.
Konferensiyada Qo‘shilmaslik harakati parlament tarmog‘i byurosi va doimiy komissiyalarini shakllantirish, shuningdek, xalqaro tashkilotlarga Qo‘shilmaslik harakati parlament tarmog‘i huzurida kuzatuvchi maqomi berish to‘g‘risidagi tashkiliy masalalar ko‘rib chiqildi va qarorlar qabul qilingan.
Tadbir yakunida uning natijalarini sarhisob qilgan holda Jeneva deklaratsiyasi qabul qilingan.
Izoh (0)