“Ichki ishlar organlarining navbatchilik qismlarida alkotester yordamida shaxslarning alkogolli ichimlik iste’mol qilganini aniqlash tartibi to‘g‘risidagi nizomni tasdiqlash haqida”gi Vazirlar Mahkamasi qarori qabul qilindi.
Unga ko‘ra, ichki ishlar organlari xodimlari yoki Milliy gvardiya organlari harbiy xizmatchilari yoki xodimlari tomonidan huquqbuzarlik sodir etganlik holatini aniqlash maqsadida ichki ichlar organlarining navbatchilk qismlariga olib kelingan shaxslar alkogolli ichimlik iste’mol qilgani alkotester yordamida tekshiruvdan o‘tkaziladi.
Quyidagilar tekshiruv o‘tkazish uchun asos bo‘ladi:
- shaxsning og‘iz bo‘shlig‘idan alkogol hidi kelishi;
- shaxsning bir holatda to‘g‘ri tura olmasligi (chayqalib turishi);
- shaxs nutqining buzilgani;
- shaxsning qo‘l barmoqlari qaltirashi;
- shaxs yuz terisi rangi sezilarli o‘zgargani.
Mas’ul xodimlar har qanday vaziyatda tekshiriluvchi shaxs bilan vazmin, xushmuomala, odobli va e’tiborli bo‘lishi, ularga hurmat bilan va “siz” deb murojaat qilishi, ular bilan o‘zaro munosabatda muomala madaniyati va qonuniylikka rioya qilishi lozim.
Ma’muriy huquqbuzarlik sodir etganlikda gumon qilinayotgan shaxs alkotester yordamida tekshiruvdan o‘tkazilib, uning organizmida alkogol mavjudligi aniqlansa, biror natijalari bo‘yicha ushbu shaxsda e’tirozlar bo‘lgan taqdirda, uning organizmida alkogol mavjudligini aniqlash maqsadida tibbiy tekshiruvdan o‘tkazish uchun ushbu shaxs mas’ul xodimlar tomonidan tuman (shahar) davolash profilaktika muassasalariga olib boriladi.
2024—2025-yillar davomida huquqbuzarliklar profilaktikasi tizimini rivojlantirish jamg‘armalari hisobidan 208 dona alkotester qurilmalari bosqichma-bosqich sotib olinadi.
Ichki ishlar organlarining navbatchilik qismlari alkotesterlar bilan to‘liq ta’minlangunga qadar shaxslar tuman (shahar) davolash profilaktika muassasalariga qonunchilik hujjatlarida belgilangan tartibda olib boriladi.
Eslatib o‘tamiz, hozirgi kunda ichki ishlar organlariga ma’muriy huquqbuzarlik sodir etganlikda gumon qilinib olib kelingan shaxslarning mastlik holatini tekshirish uchun ularni tibbiyot muassasalariga olib borib tekshiruvdan o‘tkazish ichki ishlar xodimlari oldiga qo‘yilgan vazifalarni tezkorlik bilan hal qilishda qiyinchiliklar tug‘dirayotgani ma’lum qilingandi.
Shu sababli Ichki ishlar organlarining navbatchilik qismlarida alkotester yordamida shaxslarning alkogolli ichimlik iste’mol qilganini aniqlash tartibi yo‘lga qo‘yildi.
Izoh (0)