O‘zbekistondagi tuman (shahar) ichki ishlar organlari navbatchilik qismlari 2024—2025-yillarda bosqichma-bosqich alkotesterlar bilan ta’minlanadi. Bu haqda Vazirlar Mahkamasining “Ichki ishlar organlarining navbatchilik qismlarida alkotester yordamida shaxslarning alkogoldan mastlik holatida ekanligini tekshirish tartibi to‘g‘risidagi nizomni tasdiqlash haqida”gi qarori loyihasida ko‘zda tutilgan.
Mazkur loyiha Prezident administratsiyasi topshirig‘i ijrosini ta’minlash maqsadida Ichki ishlar vazirligi tomonidan ishlab chiqilgan.
Hujjatda qayd etilishicha, hozirgi kunda ichki ishlar organlariga ma’muriy huquqbuzarlik sodir etganlikda gumon qilinib olib kelingan shaxslarning mastlik holatini tekshirish uchun ularni tibbiyot muassasalariga olib borib tekshiruvdan o‘tkazish ichki ishlar xodimlari oldiga qo‘yilgan vazifalarni tezkor bilan hal qilishda qiyinchiliklar tug‘dirmoqda.
Shu bilan birga, ichki ishlar organlarining navbatchilik qismlarida shaxslarning mastlik holatini tekshirish zamonaviy va vaqtni tejaydigan moslamalarni qo‘llashni tashkil etish, xususan, alkotesterlardan foydalanish zaruratini yuzaga keltirmoqda.
Ma’muriy javobgarlik to‘g‘risidagi kodeksining 32-moddasi 6-bandiga asosan javobgarlikni og‘irlashtiruvchi holat etib belgilangan huquqbuzarlikning mast holda sodir etilganligini aniqlash zaruriyati mavjud. Bu esa, o‘z navbatida, ma’muriy huquqbuzarlik sodir etganlikda gumon qilinib olib kelingan shaxslarni tezkorlik bilan mastlik holatini tekshirishni talab etadi.
Mazkur yo‘nalishdagi xalqaro tajriba o‘rganilganida ayrim davlatlar (Rossiya, AQSH, Kanada, Fransiya, Qozog‘iston, Buyuk Britaniya, Turkiya va Janubiy Koreya)da maxsus moslamalar (alkotester)dan faqatgina yo‘l-patrul xizmati xodimlari va tibbiyot muassasalarida foydalanilishi, boshqa ichki ishlar xodimlari tomonidan foydalanish tartibi ishlab chiqilmagani ma’lum bo‘ldi.
Loyihaning qabul qilinishi ma’muriy huquqbuzarlik sodir etganlikda gumon qilinib ichki ishlar organlariga olib kelingan shaxslarning alkogoldan mastlik holatini alkotester yordamida tezkorlik bilan tekshirish imkoniyatini yaratadi.
Qaror loyihasining qabul qilinishi boshqa normativ-huquqiy hujjatlarga o‘zgartirish va qo‘shimchalar kiritish zaruratini keltirib chiqarmaydi.
Loyihani amalga oshirish uchun 2024—2025-yillar davomida bosqichma-bosqich jami 208 dona alkotester qurilmalarini Qoraqalpog‘iston Respublikasi IIV, Toshkent shahar va Toshkent viloyati IIBB hamda viloyatlar IIBning huquqbuzarliklar profilaktikasi tizimini rivojlantirish jamg‘armalari hisobidan olinishi rejalashtirilmoqda.
Izoh (0)