“Ички ишлар органларининг навбатчилик қисмларида алкотестер ёрдамида шахсларнинг алкоголли ичимлик истеъмол қилганини аниқлаш тартиби тўғрисидаги низомни тасдиқлаш ҳақида”ги Вазирлар Маҳкамаси қарори қабул қилинди.
Унга кўра, ички ишлар органлари ходимлари ёки Миллий гвардия органлари ҳарбий хизматчилари ёки ходимлари томонидан ҳуқуқбузарлик содир этганлик ҳолатини аниқлаш мақсадида ички ичлар органларининг навбатчилк қисмларига олиб келинган шахслар алкоголли ичимлик истеъмол қилгани алкотестер ёрдамида текширувдан ўтказилади.
Қуйидагилар текширув ўтказиш учун асос бўлади:
- шахснинг оғиз бўшлиғидан алкогол ҳиди келиши;
- шахснинг бир ҳолатда тўғри тура олмаслиги (чайқалиб туриши);
- шахс нутқининг бузилгани;
- шахснинг қўл бармоқлари қалтираши;
- шахс юз териси ранги сезиларли ўзгаргани.
Масъул ходимлар ҳар қандай вазиятда текширилувчи шахс билан вазмин, хушмуомала, одобли ва эътиборли бўлиши, уларга ҳурмат билан ва “сиз” деб мурожаат қилиши, улар билан ўзаро муносабатда муомала маданияти ва қонунийликка риоя қилиши лозим.
Маъмурий ҳуқуқбузарлик содир этганликда гумон қилинаётган шахс алкотестер ёрдамида текширувдан ўтказилиб, унинг организмида алкоголь мавжудлиги аниқланса, бирор натижалари бўйича ушбу шахсда эътирозлар бўлган тақдирда, унинг организмида алкогол мавжудлигини аниқлаш мақсадида тиббий текширувдан ўтказиш учун ушбу шахс масъул ходимлар томонидан туман (шаҳар) даволаш профилактика муассасаларига олиб борилади.
2024—2025 йиллар давомида ҳуқуқбузарликлар профилактикаси тизимини ривожлантириш жамғармалари ҳисобидан 208 дона алкотестер қурилмалари босқичма-босқич сотиб олинади.
Ички ишлар органларининг навбатчилик қисмлари алкотестерлар билан тўлиқ таъминлангунга қадар шахслар туман (шаҳар) даволаш профилактика муассасаларига қонунчилик ҳужжатларида белгиланган тартибда олиб борилади.
Эслатиб ўтамиз, ҳозирги кунда ички ишлар органларига маъмурий ҳуқуқбузарлик содир этганликда гумон қилиниб олиб келинган шахсларнинг мастлик ҳолатини текшириш учун уларни тиббиёт муассасаларига олиб бориб текширувдан ўтказиш ички ишлар ходимлари олдига қўйилган вазифаларни тезкорлик билан ҳал қилишда қийинчиликлар туғдираётгани маълум қилинганди.
Шу сабабли Ички ишлар органларининг навбатчилик қисмларида алкотестер ёрдамида шахсларнинг алкоголли ичимлик истеъмол қилганини аниқлаш тартиби йўлга қўйилди.
Изоҳ (0)