“Yer va yerosti boyliklarini asrab qolish va muhofaza qilishdagi qonunchilik takomillashtirilishi munosabati bilan Jinoyat kodeksiga hamda Ma’muriy javobgarlik to‘g‘risidagi kodeksga qo‘shimcha va o‘zgartirishlar kiritish to‘g‘risida”gi qonun loyihasi e’lon qilindi.
Qonun loyihasi bilan fuqarolar tomonidan yer berish tartibini buzish hamda yer tuzish loyihalaridan o‘zboshimchalik bilan chetga chiqish, davlat yer kadastri yuritish qoidalarini buzish bilan bog‘liq huquqbuzarliklarni aniqlash va ushbu huquqbuzarlik uchun ma’muriy bayonnoma rasmiylashtirish vakolati profilaktika inspektorlariga ham berilishi kutilmoqda.
Hujjatda qayd etilishicha, huquqbuzarliklarni rasmiylashtirishdagi mavjud tizim, huquqbuzarlarni ma’muriy tartibda IIB yoki tayanch punkt binosiga keltirish, shu yerning o‘zidagina ularning xatti-harakatlarini hujjatlashtirish bilan bog‘liqligi, fuqarolar uchun ham jiddiy sun’iy ravishdagi noqulayliklar, ovoragarchiliklarni tug‘dirishiga, ular tomonidan turli e’tirozlar bildirilishiga sabab bo‘lmoqda.
Yer to‘g‘risidagi qonun buzilishi holatlarini aniqlash vakolati IIV Tezkor-qidiruv departamenti va uning quyi tizimlarida tashkil etilgan Yer resurslari talon-toroj qilinishiga qarshi kurashish bo‘linmalariga yuklatilgani, ushbu bo‘linmalar xodimlarining soni kamligi, har bir mahallaga kirib borish imkoniyati yo‘qligi bois, bu turdagi huquqbuzarliklar kam aniqlanayotganligi sababli profilaktika inspektorlariga Ma’muriy javobgarlik to‘g‘risidagi kodeksning 66 (yer berish tartibini buzish) va 68-moddalari (yer tuzish loyihalaridan o‘zboshimchalik bilan chetga chiqish, davlat yer kadastri yuritish qoidalarini buzish) bo‘yicha ma’muriy bayonnoma rasmiylashtirish vakolatini berish zarurati yuzaga keldi.
Taklif etilayotgan qonun loyihasining qabul qilinishi natijasida fuqarolar tomonidan yer berish tartibini buzish hamda yer tuzish loyihalaridan o‘zboshimchalik bilan chetga chiqish, davlat yer kadastri yuritish qoidalarini buzish bilan bog‘liq huquqbuzarliklarni aniqlash va ushbu huquqbuzarlik uchun ma’muriy bayonnoma rasmiylashtirish vakolati profilaktika inspektorlariga berilib, ushbu huquqbuzarliklarni sodir etilishi oldi olinadi.
Izoh (0)