ISHID tashkilotining Xuroson bo‘limi rahbari Shahab al-Muhojir Pokistonning Balujiston viloyati hududida yashamoqda. Bu haqda Ava Press nashri xorijiy razvedka maʼlumotlariga asoslanib, xabar berdi.
Xabarda aytilishicha, Shahab al-Muhojir nomi bilan tanilgan Sanoulloh G‘afariy o‘tgan yilning iyun oyida Afg‘onistonning Kunar viloyatida o‘ldirilgan deb eʼlon qilingan edi. Reuters agentligi esa uning Pokistonga qochib ketgani va chegaradagi Balujiston viloyatida yashayotgani haqida xabar bergan.
Reuters maʼlum qilishicha, ISHID terrorchilik guruhi o‘zining markaziy boshqaruvidan so‘nggi yillarda mahrum bo‘lgan bo‘lsa-da, uning bo‘limlari butun dunyo bo‘ylab tarqalib ketgan. Uyushmagan guruhlar esa oldingidan kam bo‘lmagan tahdidlarni yuzaga keltirmoqda.
Manbada aytilishicha, Moskva hujumi ortida turgan guruh ham aynan Pokiston va Afg‘onistonda joylashgan ISHID Xurosonidir.
ISHID Xurosoni uzoq vaqtdan beri Markaziy Osiyo davlatlaridan muhojirlar va jangarilarni yig‘ib, ularni Rossiyada terakt uyushtirishga o‘rgatgani aytilgan.
Izoh (0)