Xorazm va Surxondaryo viloyatlarida kredit mablag‘larini talon-toroj qilgan MCHJlar aniqlandi, deb xabar beradi Bosh prokuratura huzuridagi departament.
Qayd etilishicha, departamentning Xorazm viloyat boshqarmasi tomonidan tergovga qadar tekshiruv o‘tkazilgan. Tekshiruvda “G.H.” MCHJ rahbari J.J. Shovot tumani hududidagi 3 gektar yer maydonida zamonaviy issiqxona qurish uchun tijorat banki filialidan ajratilgan kredit mablag‘i evaziga xorijdan olib kelingan kompleks uskunalarning bir qismini boshqa shaxslarga sotib yuborib, jami 2,6 milliard so‘m kreditni o‘zlashtirish va rastrata qilish yo‘li bilan talon-toroj qilgani aniqlangan.
Shu kabi, departamentning Sariosiyo tuman bo‘limi tomonidan o‘tkazilgan tergovga qadar tekshiruvda “B.F.” MCHJni norasmiy boshqarib kelgan M.A. “Niholzor” MFYda issiqxona tashkil etish maqsadida ajratilgan 2 milliard so‘m kredit evaziga issiqxonalarni qurmasdan, ushbu mablag‘larni o‘zlashtirish yo‘li bilan talon-toroj qilgani hamda 303,4 million so‘m soliq to‘lashdan bo‘yin tovlagani aniqlangan.
Mazkur holatlar yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Surxondaryoda xususiy bog‘cha qurish uchun ajratilgan 356 mln so‘m kredit mablag‘lari talon-toroj qilingani to‘g‘risida xabar berilgandi. Shuningdek, Toshkent viloyatida fermer xo‘jaligi 3,1 mlrd so‘m imtiyozli kredit mablag‘ini o‘zlashtirgani ma’lum bo‘lgan edi.
Izoh (0)