Shavkat Mirziyoyev taklifiga binoan Qozog‘iston prezidenti Qosim-Jo‘mart To‘qayev 5-aprel kuni O‘zbekistonga keldi.
Prezident matbuot xizmatining xabar qilishicha, Urganch xalqaro aeroportida oliy martabali mehmonni davlat rahbari kutib oldi. Milliy qo‘shiq va raqslardan iborat tantanali marosim bo‘ldi.
Tashrif davomida ikki davlat yetakchilari muzokaralar o‘tkazadi va qadimgi Xiva shahrining tarixiy obidalari bilan tanishadi.
Xiva shahrida o‘tadigan muzokaralarda O‘zbekiston bilan Qozog‘iston o‘rtasidagi strategik sheriklik va ittifoqchilik munosabatlarini yanada mustahkamlash hamda ko‘p qirrali hamkorlikni kengaytirishning dolzarb masalalari ko‘rib chiqiladi.
O‘zaro tovar ayirboshlash hajmini ko‘paytirish, iqtisodiyotning muhim tarmoqlarida kooperatsiya aloqalarini rivojlantirish, transport va energetika sohalarida infratuzilmaviy loyihalarni amalga oshirish, gumanitar dasturlarni faollashtirishga alohida eʼtibor qaratiladi.
Davlat rahbarlari mintaqaviy kun tartibidagi masalalarni ham muhokama qiladi.
Izoh (0)