Turkiya hukumati NATO aʼzolaridan Anqarani terrorizmga qarshi kurashda qo‘llab-quvvatlashni so‘radi. Bu haqda Anadolu nashri xabar berdi.
Manbada aytilishicha, 4-mart kuni Turkiya tashqi ishlar vaziri Xoqon Fidan Bryusselda NATO yig‘ilishida ishtirok etib, tashkilotni xalqaro terrorizmga qarshi kurashda hamjihatlikka undagan. Turkiyaning Iroq shimolida boshlagan operatsiyasida amaliy yordam so‘ragan.
Fidan muzokaralar chog‘ida NATOga aʼzo baʼzi davlatlarning Suriyadagi terrorchi guruhlar bilan hamkorligidan xavotir bildirgan. Ushbu holat xavfsizlikka tahdid ekanligini maʼlum qilgan.
O‘tgan yili Vilnyusda bo‘lib o‘tgan sammitda terrorga qarshi kurash koordinatori tayinlanishi borasida kelishib olinganini taʼkidlagan Fidan NATOning terrorizmga qarshi kurashni “strukturaviy” ko‘zdan kechirishi uchun saʼy-harakatlarning davom etayotganini bildirib o‘tgan.
Turkiya rasmiysi, shuningdek, Kurdiston ishchi partiyasi faoliyati haqida maʼlumot bergan. So‘nggi oylarda tashkilot faoliyati kuchaygani haqida xabar qilgan.
“Yevropa davlatlari uchun achinarlisi shundaki, ular yillar davomida nazarga ilmay kelgan terror tashkiloti ularning ko‘chalarida terror uyushtirmoqda”, — degan Xoqon Fidan.
Maʼlumot o‘rnida, Turkiya hukumati Kurdiston ishchi partiyasiga qarshi 40 yildan beri kurash olib boradi. Ushbu tashkilot Turkiya, AQSH va Yevropa Ittifoqi tomonidan terrorchi tashkilotlar ro‘yxatiga kiritilgan. Partiya shu paytga qadar uyushtirgan teraktlarda 40 000 nafardan ortiq odam, jumladan, ayollar, bolalar va go‘daklar halok bo‘lgan.
Izoh (0)