Туркия ҳукумати НАТО аъзоларидан Анқарани терроризмга қарши курашда қўллаб-қувватлашни сўради. Бу ҳақда Anadolu нашри хабар берди.
Манбада айтилишича, 4 март куни Туркия ташқи ишлар вазири Хоқон Фидан Брюсселда НАТО йиғилишида иштирок этиб, ташкилотни халқаро терроризмга қарши курашда ҳамжиҳатликка ундаган. Туркиянинг Ироқ шимолида бошлаган операциясида амалий ёрдам сўраган.
Фидан музокаралар чоғида НАТОга аъзо баъзи давлатларнинг Суриядаги террорчи гуруҳлар билан ҳамкорлигидан хавотир билдирган. Ушбу ҳолат хавфсизликка таҳдид эканлигини маълум қилган.
Ўтган йили Вильнюсда бўлиб ўтган саммитда террорга қарши кураш координатори тайинланиши борасида келишиб олинганини таъкидлаган Фидан НАТОнинг терроризмга қарши курашни “структуравий” кўздан кечириши учун саъй-ҳаракатларнинг давом этаётганини билдириб ўтган.
Туркия расмийси, шунингдек, Курдистон ишчи партияси фаолияти ҳақида маълумот берган. Сўнгги ойларда ташкилот фаолияти кучайгани ҳақида хабар қилган.
“Европа давлатлари учун ачинарлиси шундаки, улар йиллар давомида назарга илмай келган террор ташкилоти уларнинг кўчаларида террор уюштирмоқда”, — деган Хоқон Фидан.
Маълумот ўрнида, Туркия ҳукумати Курдистон ишчи партиясига қарши 40 йилдан бери кураш олиб боради. Ушбу ташкилот Туркия, АҚШ ва Европа Иттифоқи томонидан террорчи ташкилотлар рўйхатига киритилган. Партия шу пайтга қадар уюштирган терактларда 40 000 нафардан ортиқ одам, жумладан, аёллар, болалар ва гўдаклар ҳалок бўлган.
Изоҳ (0)