Turkiya Milliy mudofaa vazirligi 2-aprel kuni Turkiya xavfsizlik kuchlari Iroq shimolida Kurdiston ishchi partiyasining olti nafar jangarisini yo‘q qilganini maʼlum qildi. Bu haqda Anadolu nashri xabar berdi.
Xabarda aytilishicha, jangarilar Metina va Gara hududlarida havo kuchlari tomonidan nishonga olingan. Operatsiya davomida jangari guruh to‘la yo‘q qilingan.
“Operatsiyalarimiz qatʼiyat bilan davom ettiriladi va mintaqada oxirgi terrorchi yo‘q qilinguncha to‘xtamaydi,” — deyiladi Milliy mudofaa vazirligi xabarida.
Kurdiston ishchi partiyasi jangarilari Turkiyada terror hujumlari uyushtirish maqsadida ko‘pincha Iroq shimolidagi chegara atroflarida o‘rnashib oladi. Turk hukumati Iroq shimolidagi tog‘li hududda doimiy tarzda harbiy mashg‘ulotlar olib boradi.
Maʼlumot o‘rnida, Kurdiston ishchi partiyasi 40 yildan ko‘proq paytdan beri faoliyat yuritib keladi. Partiya Turkiya, AQSH va Yevropa Ittifoqi tomonidan terrorchi guruhlar ro‘yxatiga kiritilgan. Faoliyati davomida Kurdiston ishchi partiyasi Turkiyada 40 ming nafardan ortiq odam, jumladan, ayollar, bolalar va go‘daklar o‘limiga sababchi bo‘lgan.
Izoh (0)