Krishtianu Ronaldu “Real” afsonasi “An-Nassr”ning sport direktori bo‘lishini xohlamoqda

Krishtianu Ronaldu “An-Nassr”ga sobiq futbolchi Fernando Yerro olib kelinishini xohlamoqda. 

Yerro va Saudiya klubi o‘rtasidagi dastlabki aloqalar yanvar oyida bo‘lgandi, o‘shanda Fernando klubda ishlashdan bosh tortgan. Shundan so‘ng rahbariyat Portugaliyadan sport direktori izlashni boshlagandi.

Biroq, so‘nggi vaqtlarda “Real” afsonasi va “An-Nassr” o‘rtasidagi aloqalar yana tiklangan, deya xabar bermoqda Marca nashri. 

Ronaldu Yerroni qadrlaydi va u futbolda nimalarga erishganini juda yaxshi biladi. Krishtianu u “An-Nassr”ni Yevropa darajasiga olib chiqa oladi deb hisoblaydi.

Fernando “An-Nassr”ning taklifni qabul qilishi kutilmoqda. Yerro hozirda Meksikaning “Gvadalaxara” jamoasi sport direktori lavozimida faoliyat olib bormoqda.