Saudiya Arabistoni chempionatining 26-turidan o‘rin olgan navbatdagi uchrashuv seshanba, 2-aprel kuni bo‘lib o‘tdi. Unda “An-Nassr” safarda “Abha” mehmoni bo‘ldi.
Krishtianu Ronaldu bu o‘yinda het-trik qayd etib jamoasining yirik hisobda g‘alaba qozonishiga yordam berdi. “An-Nassr” uchrashuvda 8:0 hisobida g‘alaba qozondi.
O‘z hisobiga uchta gol yozdirib qo‘ygan Ronaldu, o‘ziga tegishli bir nechta natijalarni yangilab oldi.
- Portugaliyalik futbolchi “An-Nassr” safida 60 o‘yinda maydonga tushdi va ushbu o‘yinlarda 56 gol va 14 golli uzatmani amalga oshirdi.
Het-trik qayd etgan Ronaldu 30-mart kuni u “At-Tai” darvozasiga ham uchta gol urishga erishgan edi.
So‘nggi bor hujumchi 2015-yilda “Real” safida o‘ynab ketma-ket ikkita het-trik qayd etgandi. O‘shanda u 12-sentyabr kuni La Ligada “Espanyol”ga 5 ta, 15-sentyabrda esa Chempionlar ligasida “Shaxtyor”ga 3 ta gol urgandi.
- Portugaliyalik futbolchi faoliyati davomida 65 ta het-trik qayd etgan. Argentinalik Messi 57 ta o‘yinda shunday natijaga erishgan. het-triklarning 29 tasida Ronaldu gollarning birini penaltidan urgan. Messida esa bu holat 12 bor qayd etilgan.
- Ronaldu “Abha”ga qarshi o‘yinda jarima to‘pidan ikki bor gol urdi.
Oxirgi marta forvard 2023-yil 23-mart kuni Portugaliya terma jamoasi safida Lixtenshteynga qarshi o‘yinda jarima zarbasini golga aylantirgan edi.
Ronaldu oxirgi marta 2011-yilning 15-mayida jarima zarbasidan dubl qayd etgan. O‘shanda futbolchi “Real”ning “Vilyarreal” ustidan qozonilgan g‘alabasida ishtirok etgan.
Umumiy olganda, 39 yoshli futbolchi jarima zarbalaridan 63 ta gol urdi. Lionel Messida esa bu ko‘rsatkich 65 ta.
Ushbu g‘alabadan so‘ng Ar-Riyod jamoasi ochkolari sonini 62 taga yetkazib, musobaqa jadvalida 2-o‘rinda bormoqda.
Izoh (0)