Forbes: Rossiyalik milliarderlar soni 125 kishiga yetdi

Forbes reytingidagi rossiyalik milliarderlar soni yil davomida 110 dan 125 kishiga oshdi.

Bu tarixdagi eng yuqori natija deb xabar bermoqda “TASS”. Reytingdagi rossiyaliklar soni bo‘yicha avvalgi rekord 2021-yilda qayd etilgan bo‘lib, o‘shanda ularning soni 123 nafarni tashkil qilgan.

Forbes’ning ruscha versiyasiga ko‘ra, eng badavlat rossiyaliklarning umumiy boyligi yil davomida 14 foizga oshib, 576,8 milliard dollarga yetgan.

Bu ko‘rsatkich 2021-yilning rekord darajasidan past bo‘lib, 123 nafar rossiyalik milliarderning umumiy kapitali 606,2 milliard dollarga yetgan.

Rossiyalik ishbilarmonlar orasida ro‘yxatning yetakchisi “Lukoyl” asoschisi Vagit Alekperov bo‘ldi, uning boyligi yil davomida 28,6 milliard dollargacha oshdi. Undan keyingi o‘rinda “Novatek” rahbari Leonid Mixelson bo‘lib, uning kapitali 27,4 milliard dollarga baholanmoqda.

Uchinchi o‘rinni Novolipetsk metallurgiya kombinatining asosiy aksiyadori Vladimir Lisin (26,6 milliard dollar) egalladi. Reytingda keyingi o‘rinda “Severstal”ning asosiy aksiyadori va kompaniya direktorlar kengashi raisi Aleksey Mordashov (25,5 milliard dollar) joylashgan.

Beshinchi o‘rinni Norilsk Nikel kompaniyasi prezidenti Vladimir Potanin (23,7 milliard dollar) egalladi.