Turkiyaning Beshiktosh hududidagi 16 qavatli bino yerto‘lasida 2-aprel kuni sodir bo‘lgan yong‘in oqibatida kamida 29 kishi halok bo‘ldi. Bu haqda South China Morning Post nashri turk manbalariga asoslanib xabar berdi.
Voqea joyiga tezda yetib kelgan shahar hokimi Ekrem Imomo‘g‘lu yerto‘lada tungi klub joylashganini xabar qilgan. Yong‘in aynan shu tungi klubda yuzaga kelgani taxmin qilinmoqda.
Manbaga ko‘ra, hozirga qadar kamida 29 kishi hodisa oqibatida halok bo‘lgan. 10 dan ortiq fuqaro tan jarohati olgan.
Yong‘in kunduzgi 12:47 da boshlangan. O‘t o‘chiruvchilar tomonidan olovni o‘chirishga bir necha soat vaqt ketgan.
Bino yerto‘lasida joylashgan Masquerade tungi klubi bu paytda taʼmirlash uchun yopilgan, hududda texnik ishlar olib borilayotgan bo‘lgan.
Yong‘in oqibatida binoning birinchi va ikkinchi qavatlari jiddiy shikastlangani xabar qilingan.
Izoh (0)